Trio ku a kaba di hòrta na un kas den resort na Caracasbaai detené

Nèt nan tabata bai pa repartí e botin

1597
Willemstad—–Djaweps 8 di ougùstùs 2019, alrededor di 22.11 or, polis durante su kontròl rutinario a para un vehíkulo na Caracasbaai na altura di e lugá di stashoná outo.

Den e vehíkulo tabatin tres (3) hòmber ku tabata aktua bastante sospechoso. Durante kontròl tantu den e vehíkulo komo riba e hòmbernan aki polis a haña i konfiská diferente artíkulo ku probablemente ta prosedente di ladronisia entre otro; prenda, sèn kèsh i telefòn selular. Na e sitio polis a detené e tres hòmbernan sospechoso. Ta trata di:
R.D.P., nasé na Kòrsou di 23 aña di edat;
X.M.E., nasé na Kòrsou di 29 aña di edat i
Sh.S.O., nasé na Kòrsou di 21 aña di edat.

Siguiendo ku e investigashon a resultá ku e sospechosonan mester a kibra i drenta den un kas den un resort den e área ariba menshoná i a bai ku e artíkulonan ya menshoná.

A bin haña hèrmèntnan ku tabata ser usá pa kibra drenta den kas di hende.

A presentá e trio sospechoso dilanti di un Fiskal Ouksiliar, ku a ordená nan enkarselamentu pendiente di mas investigashon.