A hinka víktima 32 biaha i kòrta su parti íntimo

9338
Sospechoso den kaso asesinato.
WILLEMSTAD,—- E hòmber Geraldino M.  tabata dilanti wes ayera unda ta sospech’é di a kita bida di e víktima di fam Bremer, ku a bin pèrdè su bida a konsekuensia di vários hinka ku el a risibí.

Durante e kaso a bin dilanti ku e sospechoso i e víktima tabatin bon relashon ku otro, esta ku nan tabata bon amigu. Segun e sospechoso ku for di chikí nan konosé otro i ku nan tabata bisiña di otro. Tambe a bin dilanti den e kaso ku M. ya a kita bida di su kasá den pasado i ku el a haña TBS pa esaki.

A puntra M. dikon nunka e no a deklará na polis unda el a splika ku e no por papia di un kos ku e no sa di dje. El a bisa ku e no tabata tei na e sitio i ku e no ta esun responsabel pa e akto aki. Mas aleu el a splika ku algun ratu promé ku e echo a tuma lugá e tabata huntu ku e víktima. Tur esaki despues ku 17 yanüari último el a bin Kòrsou i tabata mir’e konstantemente na kas di e víktima.

El a bisa ku e no tabata keda drumi na kas di e víktima i ku en bèrdat su outo tabata pará hopi na e kas ei, pero tin biaha e outo tabata tei pero e mes no. Segun e sospechoso ku en bèrdat nan tabata bai kumpra droga i bebe alkohòl pero e no por kore paranda manera e víktima ta hasi mas. Segun e sospechoso ku el a sera su mes for di dia a detené riba e kaso, mirando ku e no por a pensa ku ta bin detené pa esaki.

E sospechoso den su deklarashon ayera a trese dilanti ku e deskripshon ku a duna di e persona ku lo mester tabata manehá e outo no ta kuadra ku esun di dje. Mas aleu el a trese dilanti ku tabata ora ku el a bai kas bèk, ku el a bin haña e vehíkulo di dje pará na kas, unda el a bin haña e yabi di e outo den dje skondí.

Mas aleu el a bisa ku e no sa kon e outo lo a yega na e kas i ku ta e víktima el a fia e outo. A bin dilanti den e kaso ku ta na aña 2017 el a rekobrá su libertat den e kaso asesinato ku el a kometé na aña 2009. Wes a disidí ku e ta para e kaso pa rapòrt di NFI, miéntras tambe el a bisa ku e kier pa skucha e persona ku a deklará na fabor di e sospechoso komo testigu i kier pa notifiká e famia nan di e víktima na tempu pa nan tei.