Despues di 27 di Ougùstùs Demokrat ta sa desishon di Gassan Dannawi

668
Gassan Dannawi: E ta pon’é pa regresá 27 di ougùstùs. Despues di su yegada e lo pone Partido Demokrat na altura di su desishon.
Punda– —E promé media ku a duna atenshon na  echo ku Sr Gassan Dannawi por ta na kaminda pa Partido Demokrat tabata Vigilante. E publikashon a trese kuné hasta ku Sra Marilyn Mozes a ray’e, sin ku nada tabata ofisial ainda na 2018.

Di forma eksklusivo Vigilante a publiká na 2018 ku despues di 2 di yüli lo bira konosí kiko tei bira dje futuro polítiko di Sr Gassan Dannawi. Manera ta konosí Sr Gassan Danawi a tuma su tempu i hustamente 19 di ougùstùs 2018 el a keda apuntá komo presidente nobo di Partido Demokrat. Na e okashon ei despues di rekurí na rondanan di konsulta den su seno, el a tuma e desishon ku lo marka su karera polítiko i mester bisa ku for di 19 di  ougùstùs 2018 el a kuminsá profilá hasta manera un lider polítiko dje partido.  Ta asina ku den promé instante e tabata den dos, esta lanta su propio partido òf bai forma parti di un partido eksistente, kua al final a resultá den uni su mes na Partido Demokrat. E último biaha ku el a bai elekshon tabata 28 di aprel 2017 riba lista di MP kaminda el a okupá puesto number 2 i saka 501 voto. Pa lokual ta trata Partido Demokrat tur kos tabata indiká ku e lo bira e persona ku lo bai enkabesá e lista pa e elekshon ku tin di tuma lugá na 2021, pero ta resultá ku e chèns ta grandi ku nan lo tin di buska un otro persona pa hasi e trabou. E último biaha ku e partido aki a saka asiento tabata tempu ku Sr Norbert George tabata lider, pero mester bisa ku awor aki despues di 1 aña ku a instalá Sr Gassan Dannawi komo presidente ku nan lo tin di buska un lider polítiko nobo.

Na e momentunan aki Sr Gassan Dannawi ta na Libanon i estando aya nan e ta pensando kiko e ta bai hasi ku su karera polítiko. Despues di risibí informashon ku e no ta aspirá mas pa bira lider polítiko di Partido Demokrat nos a tene kontakto ku su persona. Nos a sali konfront’é ku e pregunta ku nos ta informá ku promé ku aña kaba e lo laga kai. Den promé instante el a keda sorprendí ku nos pregunta, pero durante dje entrevista el a kuminsá divulgá nos indikashonnan den ki direkshon e ta pensando. Ta asina ku e ta pendiente pa regresá Kòrsou dia 27 di ougùstùs awor. E tin ya kaba mas ku 3 luna na Libanon. El a mustra nos ku  despues ku e bini e lo duna di konosé kiko ta su desishon. Loke ta pisa serka dje hopi na e momentunan aki ta e echo ku su mayornan ta biba na Libanon i ku tin asuntunan ku e tin di atendé pa su tata. Tambe ta bin aserka ku su yu muhé ku ta bibando aktualmente na Merka ta preparando pa bai studia na Libanon. Tumando na kuenta tur e kompromisonan familiar ku e tin e ta konsiente ku lo e tin di biaha hopi di Kòrsou pa Libanon, anto esaki lo hasi difísil pa e profilá komo lider polítiko pa Partido Demokrat. Ku esaki na mente e no kier stroba Partido Demokrat. Mester bisa si ku estando ya pa mas ku 2 luna na Libanon e ta siguiendo tur e akontesimentunan masha di aserka. Ora e yega Kòrsou e lo pone Partido Demokrat na altura dje desishon final ku el a tuma.•