KDNT kier pa investigá malversashon plaka di pueblo di Rennox Calmes

1732
WILLEMSTAD—Aña pasá entre 20 pa 23 di mart un grupo di parlamentario a biaha pa Hulanda pa por a partisipá na un bolsa di Inter Traffic.

Un dje parlamentarionan ku a hasi esaki tabata Sr Rennox Calmes. Ta sali na kla segun alegashonnan di Partido KDNT ku Sr Rennox Calmes a probechá bai Inglatera riba un biahe privá,  kua nan ta konsiderá ku ta malversashon di plaka di pueblo a tuma lugá. Hasta ta asina ku KDNT a trese pa dilanti ku Sr Stephan Walroud kende tabata lider dje delegashon ei lo a trese esaki pa dilanti.

Rennox Calmes: E ta ser akusá pa KDNT di a usa plaka di pueblo pa biahe priva.

KDNT ta urgí presidente di Parlamento Sr William Millerson pa a start ku un investigashon relashoná ku nan akusashon den direkshon di Sr Rennox Calmes. Hasta ta asina ku KDNT a bai asina leu na mustra riba e echo ku nan kier kana e kaminda, promé ku nan usa tur nan kartanan. Nan kier Sr William Millerson espasio pa por kondusí e investigashon. Mester bisa ku anteriormente Sr William Millerson a yega di duna di konosé ku e no tin masha konosementu di lokual ku nan ta akusando Sr Rennox Calmes di dje. KDNT di den nan karta ku nan a manda pa Sr William Millerson, nan ta mustr’é riba e echo ku si e komo presidente di Parlamento no hasi e investigashon ku nan lo akusá e di inkubrimentu. KDNT no a pone fecha pa Sr William Millerson atendé e investigashon, pero si nan a mustra riba  e echo ku si Sr William Millerson no hasi nada, ku nan lo dal otro stapnan, kua tur kos ta indiká denunsia na OM, segun informashonnan ku redakshon di Vigilante ta disponé di dje.