1 mion florin pa Betrian

80
Otrobanda—E opservadó ministerial den proyekto di HNO Stanley Betrian a risibí na, suma brutu, un pago di por lo ménos 1.1 mion florin. Esaki ta sin kita responsabilidat di pago di impuesto entre 1 yüli 2017 pa 1 yüli 2019. Nombramentu di Betrian tabata na enkargo di minister Suzanne Camelia Romer.

 

Betrian a wòrdu inkorporá pa Camelia Romer komo opservadó ministerial den e proyekto, riba 1 di yüli 2017. Esaki despues ku Berenschot i SONA tabata yegando riba un areglo di 18.5 mion florin kon pa paga Ballast Nedam. Ta trata di un kleim ku Ballast Nedam a entamá, despues ku a bini retraso den konstrukshon di HNO pa motibu di kambio den lokalidat di tereno Amstel pa Otrobanda. Despues ku gobièrnu di Kòrsou, bou di kabinete Asjes na final di 2013, a opta pa kambia di lokalidat, SONA a keda enkargá pa prepará tereno di konstrukshon. Pero SONA i Berenschot no a logra na prepará e tereno na tempu i Ballast a kleim 18.5 mion florin di retraso. Entre SONA i Berenschot a start un problema grandi riba e.o. karga responsabilidat pa e kleim di retraso. SONA no tabata kier a sigui ku Berenschot mas i 30 di dezèmber SONA a manda un karta pa Berenschot ku nan no ta deseá di kontinuá. Entrante 1 di yanüari 2017, SONA a stròp ku Berenschot i pa mart 2017 nan a ofisialisá esaki.

SONA i Berenschot a kuminsá negoshá finalisashon di nan kontrakt na inisio di 2017. Pero riba 1 di yüli 2017, Stanley Betrian ta drenta e proyekto komo un “opservadó ministerial”. Na yüli mes, Betrian a sinta na mesa ku Berenschot riba nan areglo di finalisá ku SONA. Atraves di e kombersashon aki, Berenschot a stròp di negoshá nan finalisashon ku SONA. E desishon di Berenschot pa stròp di sinta na mes ku SONA, tabatin komo konsekuensha ku niun dokumentashon den poder di Berenschot no a wòrdu entrega na SONA pa asina SONA di su parti entrega e dokumentashon na gobièrnu di Kòrsou. Pa su trabounan komo opservadó ministerial., Betrian ta risibiendo por lo ménos 45 mil florin brutu mensual via di su kompania di konsehero. En total, for di 2017, Betrian a risibí 24 luna di pago. Esaki ta yega na un suma brutu di 1.1 mion florin sin kita impuesto.