Bankomátiko di RBC na Sta Rosa eksplotá pa bai ku plaka

Vehíkulo ku a ser usá a pega na kandela

128
Vehíkulo ku e ladronnan a usa na kandela djis pega ku e bankomátiko.
Willemstad—– E tim asigná pa investigá eksplotashon di mashinnan di plaka ayera den oranan di mainta trempan mester a bai Sta Rosa unda e biaha aki e bankomátiko di RBC a ser eksplotá i a logra di bai ku basta plaka.
E SUV probablemente prosedente di ladronisia ku tabata na kandela.

Djárason 14 di ougùstùs alrededor di 04.37, Sentral di Polis a risibí informashon di abitantenan den besindario, di a tende un zonido di eksploshon fuerte na un bankomátiko riba Kaminda Rignald Recordino na altura di misa di Sta. Rosa.

Na yegada di e unidat polisial na e sitio, el a bin topa ku un bankomátiko parsialmente destruí.

Den besindario tabatin un vehíkulo den kual probablemente e sospechosonan a yega na e sitio, ku tambe a sufri daño dor di e eksploshon i tabata kompletamente na kandela. Den e vehíkulo a bin haña un silinder di gas chikí i tambe un silinder di zürstòf ku a ser usa pa eksplotá e bankomátiko. Ta sospecha ku ta debí na e eksplotashon di e bankomátiko e vehíkulo tambe a sende na kandela. Tambe ta ser bisa ku e sospechosonan mester a hui bai den un SUV den direkshon di pariba.

E mashin di plaka ku a ser eksplotá den oranan di mardugá.

E tim forénsiko di polis mesora a kuminsá ku investigashon na e sitio i a sali na kla ku ta pa medio di uso di gas, e sospechosonan a kousa eksploshon na e bankomátiko i bai ku un kantidat di sèn efektivo.  Tin un sospecho basta fuerte ku un di esnan envolví den e kaso aki por a sufri kemaduranan debí na e eksplotashon. A bin tuma nota tambe ku a bai ku basta dòler ku tabatin yena den e mashin. A bin logra di haña ainda plaka den e mashin ku a keda konfiská. Tambe a logra di saka algun lachi di plaka bai kuné pa mas investigashon.  Un bia mas polis ke alerta komunidat sin ke kousa pániko, riba e peliger ku e besindario ta kore na momentu ku individuonan ta kousa eksploshon pa kometé kiebro riba bankomátikonan.

E rísiko pa si algu bai robes ta grandi i no solamente pa esunnan ku ta kometé e akto aki, pero tambe pa esnan ku ta trafiká òf biba den e área direkto di kaminda e eksploshon a tuma lugá.

Kuerpo Polisial Kòrsou huntu ku su partnernan manera Ministerio Públiko i R.S.T. ta trahando duru riba e kasonan aki i ya kaba tin algun detenshon den diferente di e kasonan anterior.

I nos ta sigui konta riba aporte di kada siudadano ku a mira algu, pa nos pone man rápido riba esnan ku a hasi nan mes kulpabel na entre otro e kaso di awe mardugá.