Berenschot a sobra 3 siman pa entregá dokumentashon di HNO

66
Otrobanda—Dokumentashon riba konstrukshon di HNO (hospital nobo) ta un problema grandi pasobra hopi sekretu skondí for di 2011 por wòrdu deskubrí. Tantu SONA komo Berenshot a keda sin kumpli ku suministrashon di informashon. Entretantu korte sivil a ordená Berenschot pa promé ku 9 di sèptèmber próksimo entrega tur dokumentashon relevante na SONA.

 

SONA di su parti tambe mester entrega na gobièrnu diferente dokumentashon. Esaki ta nifiká ku nan momento Berenschot entrega SONA dokumentashon, SONA di su parti mester entrega kopia di esaki na Gobièrnu di Kòrsou. Segun Suzanne Camelia Romer, aktual minister di salubridat públiko, mester bini un enkuesta parlamentario riba konstrukshon di hospital nobo. Camelia Romer ta referí prinsipalmente e periodo di entre 2011 pa 2016. Un investigashon preliminar di Vigilante ta señalá ku entre 2012 pa 2016, gobièrnu tabata paga SONA sin konsiderá ku SONA nunka a entrega nan kuenta anual. SONA di su parti, tabata paga Berenschot pa guia i manehá konstrukshon di hospital. Na final di 2016, SONA i Berenschot a bin kai den konflikto serio kual a kondusí SONA na finalisá nan akuerdo ku Berenschot na entrante yanüari 2017. Entretantu, Kòrsou a paga miónes. Den lokual por finalisá na un total di 600 mion florin.