Demanda di kastigu di prizòn den kaso Troya

224
WILLEMSTAD,—- Ministerio Públiko tabatin nan rekisitorio basta amplio den e kaso Troya, unda por a nota ku sigur e kastigu ku a pidi a sorprendé e sospechosonan den e kaso.

Ta trata aki di e kaso unda na aña 2007 pa 2015 tabata laga venezolanonan swaip na diferente negoshi miéntras tabata duna nan e dòler kèsh pa nan por regresá nan pais kuné. Esaki mirando ku Venezuela no tabatin dòler i di e manera aki e venezolanonan tabata logra yega na nan dòlernan, pa asina bai bende esakinan.

E venezolanonan tabata pèrdè 18 porshento kada biaha ku nan swaip, ku tabata bai direktamente riba kuenta di Monterrey, ku tabatin diferente agente i tambe sup-agente na enkargo pa buska kliente pe. Esaki a inisiá na aña 2007 unda tabatin basta ganashi ku esaki segun Ministerio Públiko. Den kaso Troya Ministerio Públiko ta persiguiendo e agentenan miéntras den Cymbal na Hulanda a persiguí famia Grynsztein.

Durante e tratamentu ayera Ministerio Públiko a trese dilanti ku tin tur prueba ku e grupo aki tabata kometé e echo kastigabel. Den e kaso aki tin e sospechosonan Balaraman, de Andrade, Zwanenburg, Asuaje i Ortega. Segun fiskalnan mr. Mul i mr. Koert ku e sospechosonan lo mester tabatin un ganashi di 233 mion dòler ku e swaipmentu aki.

E fiskal nan a trese dilanti ku a base di deklarashon di Itzhak por dedusí ku nan tur tabatin ganashi nan basta grandi. Loke tambe a hala atenshon den e kaso ta e echo ku un trahadó di e kompania Monterrey lo a deklará di tabata haña òrdu via di mail pa swaip karchi pa algun kliente. Segun e testigu ku e òrdu aki tabata bini for di Balaraman.

Otro punto den e kaso ta e echo ku Itzhak a bisa ku primeramente su ruman lo tabatin kontakto ku Balaraman i tabata dun’é tarea pa ku swaipmentu. Itzhak a trese dilanti ku tabata mas despues ku el a kuminsá tene kontakto ku e office manager Balaraman pa papia tokante e swaipmentu den e negoshi.

El a bisa ku despues na aña 2008 i 2009, e tabata e persona ku tabatin mas kontakto ku Balaraman. El a trese dilanti ku e tempu ei e tabata esun ku tabatin mas tantu kontakto ku Balaraman i ku esaki tabata sigur 80 porshento di e totalidat. E fiskalnan a kuestioná e echo di e fakturanan ku lo tabata traha unda ta para ariba ku esakinan tabata wòrdu falsifiká.

Tabata traha faktura pa e klientenan no haña nan mes ku problema na momentu ku nan yega Venezuela. E venezolano ku tabata bai ku e dòlernan Venezuela tabata bai bende esaki riba merkado pretu. Esaki tabata e dia segun Ministerio Públiko, esta ku ounke nan pèrdè e 18 porshento nan lo gana hopi na momentu ku nan bai bende kada un dòler pa 1000 Bolivar na nan pais.

Fiskal mr. Mul a bisa ku e sospechoso nan ta kastigabel unda el a pidi 30 luna di prizòn pa e sospechosonan de Andrade, Balaraman i Zwanenburg. Pa Asuaje a pidi 16 luna di prizòn miéntras pa Ortega OM a pidi 20 luna di prizòn. Tambe Ministerio Públiko a pidi pa ekspropiá e grupo aki un kantidat basta grandi di plaka.