Dokumentashon importante riba konstrukshon HNO ta skondí

136
Eks Ministers: e tres eks ministernan di finansas, Jamaloodin (te ku 2012), Jardim (te ku 2016) i Gijsbertha (te ku 2019) ta e 3 ministernan kende por splika mas mihó ta kon SONA tabata risibí plaka i paga Berenschot ku na su turno tabata paga e gastunan. Segun kálkulonan, hospital nobo tei kosta Kòrsou 500-600 mion florin.
Otrobanda—Diferente dokumentashon riba konstrukshon di hospital nobo ta “spoorloos”. Ta trata di dokumentashonnan e.o. importante pa averiguá kon i kuantu kambio di lokalidat a kosta i tambe presupuesto riba konstrukshon di un garashi pa stashoná outo.

Despues ku riba 7 di yüni 2013, kabinete Ajses a drenta Fòrti, riba 27 di yüni 2013 e tim di Ballast Nedam Infra i USONA a wòrdu invitá pa bini Hunta di Minister. Durante e reunion aki a kuminsá diskutí e posibilidat di kambio den lokalidat di hospital. E senario nobo mester a bira Otrobanda en bes di tereno na Amstel. Hunta di Minister a eksihí pa Ballast Nedam, rekalkulá i hasi un estudio pa e lokashon nobo di Colon. USONA tambe a bai di akuerdo pa huntu ku VVRP, studia e posibilidat di un lokalidat nobo den área di Otrobanda. 3 siman despues, riba 17 di yüli 2013, Ballast Nedam ta entrega  USONA resultado di su estudio. Ta trata di kambionan drástiko den volúmen di e konstrukshon i inkomparabel ku e akuerdonan di konstrukshon inisial. Dokumentashon riba e proseso di desishon abase di e estudio di Ballast Nedam a disparsé i no ta optenibel.

Konsekuentemente Hunta di Minister a kuminsá mobilisá pa kambia destinashon di e hospital pa Otrobanda, pero tabatin problema ku lugá di stashoná outo. Konsekuentemente, riba 6 i 25 sèptèmber, Ballast Nedam Infra a traha un presupuesto inisial pa e stashonamentu di vehíkulo. E presupuesto di 25 di sèptèmber tampoko no ta optenibel, anke ku gobièrnu di Kòrsou a outorisá ekspertonan pa bai buska i relatá nan. Riba 6 desèmber tambe Ballast a laga traha un prekalkulo di e konstrukshon ku nunka mas no a paresé. I na 19 desèmber, 13 dia despues a tene e “groundbreaking” ofishal di HNO na Otrobanda.

Hinter e proyekto di HNO ta falta dokumentashon importante pa realmente investigá. E fayo mas grandi tabata den man di e gobièrnunan di 2013, 2014, 2015, 2016 i 2017. Durante ningun di e aña korespondiente, SONA no a entrega su kuentanan anual pero gobièrnu di Kòrsou a sigui paga SONA durante e periodo ku SONA tabata guia i manehá e proyekto di HNO. Na yüli último den un kaso sivil, SONA a tilda Berenschot den korte di a apstené informashon i hinter e mapa di e proyekto di HNO. Esaki por laga konkluí ku na promé lugá gobièrnu di Kòrsou tabata paga SONA sin eksihí informashon miéntras SONA tabata paga Berenschot sin ku Berenschot tabata duna informashon riba kiko nan mester a wòrdu pagá.