Doño a yega e rekonosé su outo den kurá di ladron

362
Abogado ku a defendé e sospechoso.
WILLEMSTAD,—- Un kaso di ladronisia outo a keda tratá ayera den korte, unda un hóben di 22 aña mester a para responsabel pa un outo hòrtá ku lo mester a haña den su kurá di kas.

E sospechoso G.M. a presentá ku su abogado unda el a bisa ku ta kumpra el a kumpra e outo aki, esta ku e no ta responsabel pa e kaso aki. El a splika ku el a kumpra e outo aki serka 2 persona latino ku e la haña riba facebook, despues ku a buta e outo aki pa bende riba un página.

Segun Ministerio Públiko ku e hòmber G.M. mester ta kulpabel mirando ku lo e mester tabatin e outo entre 27 yanüari último i 20 di febrüari tras di lomba. Tabata 27 di yanüari tras di lomba ku lo a hòrta e Kia Picanto 2019. Segun e sospechoso ku el a kumpra e outo serka un tal Daniel i ku e persona aki tabata karga e nòmber ei riba facebook.

Mas aleu el a trese dilanti ku ora el a topa e persona nan den aria di Muizenberg, el a wak e outo i kumpra esaki sin puntra ta ken ta e tal Daniel. El a bisa ku ámbos tabata latino i ku e no a puntra nan kua ta Daniel. Durante e investigashon a bin sa ku e number di chasis ku tabatin den vehíkulo no ta kuadra ku esaki.

Ministerio Públiko a bai hasi un investigashon unda a bin nota ku e chasis aki ta pertenesé na un otro outo di marka  Kia tambe, pero ku a keda deklará ‘total loss’. Mas aleu a bin dilanti ku e sospechoso òf e persona ku lo a bende e outo lo a las e chasis aki na e vehíkulo. Tambe a bin dilanti ku e sospechoso lo a bisa ku e no a haña e papel nan di e vehíkulo.

Tambe a bin dilanti ku e sospechoso lo a buta plachi number di vehíkulo di su mama riba e outo aki, unda el a bisa ku el a uza esakinan pa e por bai kùr e outo. Mas aleu el a splika ku e no sa nada di e ladronisia. Loke sigur a hala atenshon den e kaso ta e echo ku doño di e vehíkulo lo a pasa i rekonosé su outo.

Esaki despues ku el a mira algun sla chikí na e outo, kual mesora e la bai direkshon di su propiedat. E víktima di ladronisia ku tabatin su yabi di reserva a hinka e yabi den su outo, pa asina e por habri i a konfirmá mesora ku ta di dje. Ministerio Públiko a trese dilanti ku e sospechoso ta kulpabel, unda nan a bisa ku e tabata sa di e ladronisia, paso e no a puntra unda nan a haña e vehíkulo despues ku a no a dun’e e papel.

Segun OM e no a hasi esfuerso pa sa si esaki a bin di un echo kastigabel, despues ku ni plachi number e outo aki no tabatin. A pidi un kastigu di 3 siman di prizòn, mirando ku ya el a sinta 3 siman esta pa e no bai será bèk pa motibu ku e tin trabou aktualmente. Tambe a pidi pa e traha 180 ora boluntario.

Wes mr. van Gink a trese dilanti ku en bèrdat e sospechoso a hasi su mes kulpabel di poseshon kos hòrtá, unda el a bisa ku e ta haña 3 siman di prizòn bon pero pa loke ta trabou boluntario mester baha. Wes a kastigá G.M. na 120 ora di trabou boluntario.