Dos dia di entrada hudisial na Jan Kok ku konfiskashon di 176 kilo di koka

214
Tim di aresto bon prepará subiendo e tereno di e adrès na Jan Kok.
Willemstad—- Tantu djasabra i djadumingu outoridatnan a subi un tereno basta grandi di un famia na Jan Kok pa asina por a realisá un entrada hudisial unda a konfiská basta droga, arma di kandela i tambe dos vehíkulo.
E kas na unda a bai listra tantu djasabra komo djadumingu.
A hasi uso di e helikòpter di warda kosta tambe.

Den oranan di mardugá di djasabra 10 di ougùstùs 2019 a drenta informashon ku tabatin un boto dirigiendo su mes pa kosta sur di Kòrsou ku transporte ilegal a bordo.

Outoridatnan reuniendo pa subi e tereno na Jan Kok.

Despues ku tabata probá ku e boto aki a hasi kontakto i ku tabatin transakshon na playa di Daaibooi, diferente servisio hudisial manera e.o. Polis, Duana, Wardakosta i Marina Hulandes, a drenta akshon i monta un operashon.  Seguidamente a tene un entrada hudisial na un adrès na Jankok. Ta trata di un tereno basta grandi ku na vários okashon polis a yega di realisá entrada hudisial na e kas. Tabata e tim di aresto ku a presentá i a logra di habri e porta di kura pa asina por a subi e tereno. Lentamente e tim di aresto protehando nan mes tras di un eskudo a kana bai den direkshon di e kas pa asina por a drenta den esaki. Ya na e momento ei e habitantenan a sali bin pafó di e kas ku tabata konsistí di algun dama i dos mucha menor di edat.

Asta a kamuflá e kámaranan hasiendo uso di takinan seku.

E personal di e tim di aresto a ordená nan pa sinta na suela miéntras tabata puntrando nan ken mas tabata den e kas. Despues di a haña kontesta serka e habitantenan ku no tin mas hende den e kas e tim di aresto a drenta den esaki pa asina por a kuminsá ku mas investigashon. Vigilante tin ku bisa ku un miembro di  e kas aki aktualmente ta sera pa netamente importashon di un kantidat di droga.

Ayera a bolbe bai Jan Kok pa mas investigashon.

Ta trata di e detenido Yueng ku outoridatnan a bai te Sto Domingo bai detené despues ku polis a interseptá un kargamentu basta grandi di droga i e na su turno a logra di sali for di Kòrsou bai Sto Domingo. Despues ku e tim di aresto a drenta den e kas e grupo di outoridatnan ku tabata forma parti di e akshon a subi e tereno pa asina kuminsá buska e kargamentu di droga ku un ratu promé a subi tera.

Ayera a presentá ku drone pa yuda buska.

Den e besindario di e tereno na Jan Kok unda e outoridatnan a bai pa hasi investigashon a bin topa diferente bulto di kokaina (176 kilo), un (1) arma di kandela i dos vehíkulo ku a keda konfiská, den kuadro di e investigashon.  No tabatin ningun detenshon durante di e entrada hudisial aki, miéntras a kima e droga riba e mesun dia esta riba djasabra mes.

E investigashon a kontinuá te den lat di anochi.

E investigashon no a terminá ya ku ayera djadumingu den oranan di dia un biaha mas e tim investigativo huntu ku e personal di marina a regresá na e kas na Jan kok. Un biaha mas a subi e tereno kual ta unu basta grandi i a buska tur kaminda hasiendo uso di asta di e aparato Drone. E búskeda tabata mas dirigí pa wak si ta haña mas sakunan di droga benta den e mondi i tambe esnan ku a kore bai laga e droga i e vehíkulonan atras. Investigashon den e kaso aki ta kontinuá.