Dos ruman arestá pa atrako i poseshon di droga

Den Buena Vista

106
Sto Domingoweg unda a bai pa realisá e detenshonnan.
Willemstad— E tim di aresto riba petishon di e  tim di atrako a bai na un adrès den e bario di Buena Vista pa ta mas eksakto Sto Domingoweg na unda a realisá detenshon di dos ruman hòmber.
Tambe a konfiská un arma di kandela.
Mas di loke a keda konfiská den e kas na Buena Vista.

Kontinuando ku un investigashon relashoná ku un kaso di atrako ku a tuma lugá 9 di yüni 2019 na Trupiaalweg, polis a tene entrada hudisial.  Ta trata di e kaso unda un mama i su yu a keda atraká den nan kas den e bario di Juliana Dorp.  E dia ei den oranan di anochi kuater tipo kara tapa i ku arma den man mester a drenta den e  kas na Trupialweg ku ta keda den Juliana Dorp.  Bou di menasa di arma a kuminsá pidi e famia ku tabata konsistí di un mama i yu pa entrega nan plaka. Ora ku a splika nan ku no tin sèn den e kas a kuminsá listra i a poderá di prenda nan ku a bin topa kuné. Despues di nan akto nan a Sali kore bai.  E dia ei kámara asta a graba imáhen di e vehíkulo ku tabata kore den e kaya nèt dilanti di e kas. Ayera djárason 14 di ougùstùs 2019, alrededor di 07.15 or di mainta, personal di Tim di Atrako konhuntamente ku Tim di Aresto a tene entrada hudisial den un kas na Sto. Domingoweg unda un di e sospechosonan mester ta biba.  Durante di investigashon na e kas ariba menshoná polis a detené e hòmber G.R.K.N., nasé na Kòrsou di 36 aña di edat, komo sospechoso di e kaso di atrako ariba menshoná. Den e kas polis a haña i konfiská artíkulonan ku ta di importansia pe investigashon.  Tambe polis a hasi investigashon den un apartamento riba mesun tereno na Sto. Domingoweg i a haña i konfiská droga. Relashoná ku esaki a detené e hòmber J.G.S.N., nasé na Kòrsou di 44 aña di edat, pa violashon di lei di opio.

A presentá ámbos sospechoso dilanti un Fiskal Ouksiliar ku a ordená nan enkarselamentu pendiente di mas investigashon.