Espektakular aresto di hòmber buska pa menasa

Tim di aresto a mustra ku nan ta bon entrená

104
Momento ku a blòkia e vehíkulo den aria di Brievengat pa por a realisá su aresto.
A listra i buska den e kas pero no a bin topa ku e sospechoso.

Willemstad— Di un forma relámpago e tim di aresto a blòkia un vehíkulo den aria di Brievengat pa asina por a baha e okupante i detené bai warda kuné sin ku esaki por a resistí.

E la keda detené pa un kaso di menasa ku arma di kandela.

Kontinuando ku un investigashon relashoná ku un kaso di menasa ku arma di kandela ku a tuma lugá 1 di yüli 2019 na Kaya Nene Rozendal, polis a detené un hòmber.  Primeramente a bai busk’é na su kas den aria di  Souax pero no a bin topa kuné. Mas despues a haña e informashon ku e sospechoso  ta moviendo den un vehíkulo den aria di Brievengat. Mesora a bai den e direkshon  i tabata , alrededor di 06.22’or di mainta,  ku e tim di aresto riba petishon di e personal di VVC a logra di blòkia e  vehíkulo den aria di e botika na Brievengat pa asina por a  detené e hòmber L.E.J., nasé na Kòrsou di 38 aña di edat, komo sospechoso di e kaso di menasa ariba menshoná.  E sospechoso mes a keda sorprendí kon lihé e aresto a bai.

Tabata e tim di aresto ku a realisá e detenshon.

Detenshon a tuma lugá den área di Brievengat. Tambe a konfiská e vehíkulo bai warda kuné pa mas investigashon.  A presentá e sospechoso dilanti un Fiskal Ouksiliar ku a ordená su enkarselamentu pendiente di mas investigashon.