Mas di 60 morto registrá pa áwaseru na sùit di India

82
Ta trata aki di e époka ku mas awa na e pais.

NEW DELHI – E áwaseru fuerte di e époka di monzon a kousa un total di 65 morto na sùit di India den e siman aki i a obligá otro sentenar di míles di persona di evakuá. Esaki ademas a kousa dañonan na material i suspenshon di servisio di transporte.

E estado di Kerala, un di e destino nan faborito di turismo, tabata un di esnan mas afektá. Aki tabatin un total di 27 persona ku lamentablemente a pèrdè nan bida.

Ta trata aki di e mesun region ku a keda devastá aña pasá, na momentu ku a registrá un di e pió inundashonnan di kasi un siglo. Den esaki un total di serka di 400 persona a pèrdè nan bida den tres luna i a sufri dañonan serio na infrastruktura, bibienda i otro propiedatnan, kalkulá na 2.600 mion di euro.

Segun algun imágen publiká riba retnan sosial, por mira un tèmpel antiguo hindú di Pattadakal, parsialmente sumergí bou di awa.

E desasternan meteorológiko ta normal na parti sùit di Asia den e époka di mas intensidat di áwaseru, e tempu di monzon, entre luna di yüli i ougùstùs. Esaki na momentu ku normalmente ta registrá vários shen morto i miónes di persona afektá den e region.

Den luna di yüli último kasi 300 persona a pèrdè nan bida i vários otro miónes mas a keda damnifiká na nort i nortost di e pais.