‘Mi a bin Kòrsou pa traha i no pa kai será’

293
Mr. Wilsoe a tabata fuerte den su pleitu.
WILLEMSTAD,— Ayera kaso Troya a sigui unda wes mr. van Lieshout a pasa den situashonnan persona di e sospechoso, kual e sospechoso Balaramna tabatin un splikashon amplio.

Tur esaki despues ku el a skucha ku Itzhak Grynsztein a bisa ku e tabata esun ku tabata responsabel pa e swaipmentu ku tabatin den e negoshi Monterrey. Itzhak a deklará ayera ku Balaraman tabata office manager di Monterrey i ku e tabata responsabel pa e negoshi i tabata atendé ku kliente nan ku presentá.

Tambe el a trese dilanti ku na momentu ku e kliente nan pidi pa un faktura di e swaipmentu Balaraman tabata responsabel pa esaki. Balaraman den su deklarashon a bisa ku loke e gerente di e negoshi di Monterrey a deklará no ta kuadra ku realidat. El a bisa ku nunka e no a atendé ku niun faktura.

Segun deklarashon di Balaraman ku ta e sekretaria ku tabata traha na e negoshi tabata responsabel pa esaki. Loke tambe a hala atenshon ta e echo ku un montante di mas ku 800 mil florin lo a subi kuenta di Balaraman, unda el a bisa ku esaki tabata plaka di Monterrey ku e la warda pa e doño nan. Itzhak a ninga di sa esaki, unda mesora wes a puntr’é ki ganashi Balaraman tabatin pa ku e swaipmentu aki.

Itzhak a kontestá wes ku Balaraman tabata haña algu èkstra di plaka pa e trabou aki, unda el a bisa ku e no ta kòrda ta kuantu sèn nan tabata pag’é èkstra. El a bisa ku e sa sigur ku Balaraman tabata haña algu èkstra pa ku e swaipmentu. Di otro banda e sospechoso Balaraman a trese dilanti ku en bèrdat e tabata haña algu èkstra serka Monterrey i ku esaki no tabata hopi plaka. El a bisa ku esaki tabata manera un salario èkstra den un aña.

Segun Balaraman ku en bes di kobra su salario 12 biaha den un aña e tabata kobra 13 biaha. Loke sigur a hala atenshon ta e echo ku Itzhak a bisa ku Balaraman no tabata por a buta plaka di Monterrey riba su kuenta personal. Balaraman a bisa wes ku e no a bin Kòrsou pa hasi niun malu te pa e kai será. El a bisa ku el a bin Kòrsou pa traha i gana su pan.

Awa na wowo e sospechoso a bisa wes ku el a keda 41 dia será i ku te awe ku e no por drumi, dor di tur e kosnan ku el a pasa aden di e kaso aki.