Ministerio di SMN Federashon Plataforma Banda Bou i VIBA tin nanishi den mesun direkshon

53
Willemstad——-Despues di un enkuentro djasabra 3 di ougùstùs último ku entre otro habitantenan di Banda Bou, empresarionan chikí i grandi i diferente organisashon sosial tokante e maneho pa optimalisashon i mantenshon di 7 playa di rekreo na Banda Bou, gobièrnu di Kòrsou representá pa ministerio di SMN a sinta na mesa ku ku Federashon Plataforma Banda Bou i Vishon Banda Bou (VIBA) djabièrnè 9 ougùstùs.

 

Den e afan pa inkluí spesialmente habitantenan di Banda Bou den e plan di optimalisashon i mantenshon, Ministerio di SMN a haña ta sumamente importante pa hiba un kombersashon mas ekstenso ku Federashon Plataforma Banda Bou komo representante di gran mayoria di organisashonnan originá for di e área di pabou i ku e organisashon VIBA. Partidonan a dialogá den un esfera ameno i yega na palabrashonnan konkreto riba e manera pa huntu kana trayekto pa yega na mehorashon di playanan na Banda Bou, kaminda tin e oportunidat real pa empresarionan lokal i empleo na playanan.

Minister di SMN ta sumamente kontentu i konvensí ku e esfuerso huntu ku Federashon Plataforma Banda Bou i VIBA lo ta garantia pa un desaroyo duradero di nos playanan en general i spesialmente esnan den área di Banda Bou.  Próksimamente tur esnan ku di un òf otro manera ta envolví den aktividatnan na playanan, lo risibí un invitashon pa interkambiá mas profundo riba mehorashon i optimalisashon di playanan na Banda Bou.