Ministerio Públiko a pone beslag riba salario i algun propiedat di Theo Heyliger

Djis despues ku el a kaba di ópera:

110
WILLEMSTAD—E polítiko di mas popular na Sint Martin ta Sr Theo Heyliger kende aktualmente ta na Boston. Ta asina ku djaluna tras di lomba e la keda someté na un operashon eksitoso na Boston i ta den proseso di rekuperashon. Miéntras ku e ta luchando duru ku su salú na Boston,  na Sint Maarten e la keda konfrontá ku e situashon ku OM a laga pone beslag riba su salario komo parlamentario i hasta sierto edifisionan ku ta pertenesé na su persona.

 

Den seno di su amigunan, nan ta di opinion ku OM a hasi esaki pa debilitá su forsa finansiero di moda ku e no tin e rekursonan nesesario pa por paga pa risibí bon defensa den kuadro di loke nan ku e ta ser sospecha i akusá di dje. Nos a hiba kombersashon ekstenso ku un dje mihó amigunan di Sr Theo Heyliger. El a duna di konosé ku nan sa kiko ta e meta di OM, pero ku nan lo no laga e polítiko di mas popular di Sint Martin na kaya. Konkretamente el a indiká na nos ku nan komo amigu lo perkurá pa yud’é finansieramente di moda ku e por defendé su mes. Esaki ta algu ku ya kaba nan a papia den nan seno despues ku a bira konosí ku djaweps a pone beslag riba Theo Heyliger. E kaso ku ta regardá Theo Heyliger ta hiba di nòmber Larimar. E ta ser sospechá di aktonan froudulento kometé, labamentu di plaka i tambe korupshon.  No ta konosí ainda ki dia Sr Theo Heyliger mester respondé pa ku e akusashonnan aki. Ta asina ku tabatin indikashonnan ku ta e aña aki mes lo a trata e kaso di Theo Heyliger, pero ta resultá ku konkretamente no tin fecha. Vigilante tabatin kontakto ku Roy Gouveneur bosero di OM i el a konfirmá na nos ku no tin fecha stipulá. Ta asina si ku na e momentunan aki e kondishon di  Theo ta poko delikado, tumando na kuenta ku e operashon ku el a ser someté na dje ku éksito djaluna tabata unu grandi. Den seno di su amigunan, nan no sa si lokual ku el a ser ópera p’e, lo por bin bek, pero loke si ku nan a disidí kaba ta ku si mester yud’é finansieramente pa e por defendé su mes ku nan tei p’e.