Morto i sekuestro di balseronan Venezolano

Un Bermuda Triangel nobo

116
Ya ilegalnan a baha i bai laga e lancha atras pa asina trata na buska un mihó bida.
Wardakosta ku ta sòru pa kontrolá kostanan pa evitá ku lanchanan ta drenta.
Willemstad- Kantidat grandi di balseronan ta muri òf ta keda sekuestrá momentu ku nan disidí hinka nan mes den e aventura pa yega Kòrsou òf Trinidad i Tobago. E ruta entre Venezuela i Kòrsou no ta e úniko ku ta peligroso pa bida di imigrantenan venezolano,  pero tambe pa esnan ku ta biaha pa otro direkshon.  Den ménos ku un luna un kantidat di 47 balsero mester a disparsé den laman Caribe riba embarkashonnan ku a keda noufragá direkshon Trinidad i Tobago. No ta tur embarkashon ta noufragá, hopi ta disparsé momentu ku nan ta keda sekuestrá pa esnan den mundu di trafikashon di hende. Den oranan di anochi tambe nan ta atraká e balseronan ku ta buska pa hui di e situashon di nan pais.
Detenshon di ilegalnan ku ta trata na drenta nos pais.

Un negoshi nobo ta sekuestro di e embarkashonnan i trafikashon di hende

E krísis humanitario na Venezuela i salida forsa di migrantenan a pone kriminalnan pensa un otro negoshi kaminda nan ta probechá di e nesesidat di e venezolanonan. Ta hinka den nan kabes ku nan lo haña un trabou digno na Trinidad i Tobago i durante di e aventura pa yega nan ta keda entrega na trafikantenan di hende i eksplotashon seksual. Un reportahe a keda publiká ku ta splika e kaso di Alberto Abreu un venezolano ku den pasado a keda sentensia pa trafikashon di hende muhé i ku supuestamente e tabata úniko sobrebibiente di un supuesto lancha ku aparentemente no a eksistí. Abreu mester a keda reskatá 20 mia for di kosta di Trinidad i Tobago i e mester a splika outoridatnan ku e embarkashon mester a noufragá dia 16 di mei 2019.

Lancha ku a keda interseptá i a bin topa kantidat di droga abordo.

Pero despues di 11 dia di esaki no ta tin evidensia di e aksidente. No a haña niun kadaver di e 33 personanan ku mester ta pèrdí. Di akuerdo ku un investigashon ku Asamblea Nashonal na Venezuela mester a hasi ta mustra ku e wardakosta trinitarionan ta risibí 500 dòler pa permití ku e lanchanan ta drenta e pais ku muhénan víktima di eksplotashon seksual. Segun un investigashon a mustra ku tin un operashon entre e dos paisnan di un ret di trafikashon di hende ku ta enkargá pa sekuestrá muhénan hóben pa obliganan pa prostituí. Nan ta buska nan víktimanan den diferente estado manera Táchira, Anzoátegui, Distrito Capital i Sucre. Ta konosí ku nan ta keda aserka pa amiga òf konosínan ku ta ofresénan trabou bon paga i ku ta ofresé tambe pa fia nan sèn pa e pasashi. Despues ta laga nan hospedá den Hotèlnan Plaza i Timon de Maximo na Güiria kaminda no ta keda registro di e damanan. E momentu ei nan ta keda someté i obliga pa biaha.  Segun un informe di Center For Global Affairs & Strategic Studies ta indiká ku na 2018 ku e aktonan  di pirateria marítimo ku a keda reportá na kosta oriental di Venezuela, Guyana i Sürnam nan a subi ku 167% kompará ku 2017. Gobièrnu di Trinidad i Tobago mester a krea un unidat aéreo élite kontra pirateria. E situashon pa emigrá ta kada bes mas pió, tambe e posibilidat pa yega na dòler kaminda e sistema di kontròl di kambio ta keda kontrolá pa e régimen. Ademas di esaki míles di venezolano ta warda kasi dos aña pa haña nan pasport i esaki ta pone nan den e situashon desesperá di emigrá di forma ilegal. Un kantidat di mas ku 4 mion venezolano mester a bandoná nan pais pa buska un mihó bida. Ku e fenómeno di emigrantenan aki e último añanan a keda registrá ku e lanchanan ta sali pa e paisnan den  Karibe kual ta Kòrsou, Aruba, Boneiru i Trinidad i Tobago.•