Tiradó ta mata sinku persona den lokal na Santiago de Chile

100
Outoridatnan a indiká ku a haña mas di 70 hùls na e sitio di e tiroteo.

SANTIAGO DE CHILE – Un hòmber kende ainda ta keda buská pa outoridatnan polisial, a pone fin na bida di sinku persona. Esaki despues ku el a drenta den un lokal ta lòs bala na e munisipio di Puente Alto, na Santiago de Chile. E insidente aki a keda registrá den oranan di djaweps anochi.

E insidente aki a keda registrá algu despues di 9or di anochi, na un lokal di diferente weganan, situá den e poblashon di ‘Carol Urzua’. Esaki na masoménos 209 kilometer sùitost di e kapital chileno.

E víktimanan mortal ta kuater hòmber i un muhé.Dos di esaki nan a fayesé di forma instantáneo i otro tres a fayesé miéntras nan tabata risibí atenshon médiko na un sentro médiko di e sektor.

Segun a keda indiká, tabatin un espesie di problema chikí pafó di e lokal i posteriormente algun persona a kuminsá hui i aki tabatin un tiroteo den interior di e lokal.

Segun testigunan, dos hòmber a inisiá ku un diskushon pafó di e lokal i un di esaki nan a bai intentá di hui, drentando den e lokal, miéntras ku otro a saka un arma di kandela i persiguié te den esaki, unda a los bala di forma indeskriminá.

Despues di e tiroteo, a haña un total di 70 hùls na e sitio, tantu paden komo pafó di e lokal. Outoridatnan a agregá ademas ku segun tur kos ta indiká, e outor tabatin un arma di kandela adaptá pa lòs tiru lihé, ekipá ku un kargadó di kapasidat pa un gran kantidat di proyektil.

E víktimanan, tres di kua tabatin antesedentenan polisial, a keda identifiká komo Luis Borquez Arriagadam di 46 aña, Yessica Reyes Arellano, di 47 aña, Jimmy Avalos Gallados, di 45 aña, Yerko Riveros Munoz, di 18 aña i Milton Lara Iturra, di 38 aña.