Tom Zimmerman tambe a pasa forma parti di Génesis

344
Den e forma aki ‘E Mulina’, a gara nan tres den studio di grabashon na studio di Michael Bianchi.

WILLEMSTAD,—-For di djabièrnè tras di lomba ‘E Mulina’, a bisa ku tin algun moveshon ta bai tuma lugá den nos farándula lokal, prinsipalmente den ámbito di Kòmbèk. Tambe nos a bisa aserka ku ‘E Mulina’, ta bai slùip algun di e moveshon nan pa asina nos wak kua di nan nos lo gara na mesa sinta.

T’asina ku djasabra tras di lomba. ‘E Mulina’, a haña un yamada ku nos mester ta pura na Studio di Michael Bianchi, paso tin algun moveshon ta tumando lugá. Mester bisa ku manera Bip Bip ‘E Mulina’, a kore bai na Studio di Michael Bianchi.

Esaki a sosodé den kareda di 5 or di djasabra atardi. Na yegada di ‘E Mulina’, nos mira algun outo di persona nan konosí para pafó. Esaki a pone ku mes ora nos a stèl pa nos kana drenta den e studio ariba menshoná, paso nos meta ta semper pa gara kada artista den nan nogoshashon nan ku ta tumando lugá.

Mester bisa ku na momentu ku nos a drenta den studio di Michael Bianchi, ‘E Mulina’, a tuma nota ku e gran kantante den ámbito di Kòmbèk ku ta Tom Zimmerman tabata grabando un piesa, i den su banda nos a tuma nota di Ike Jesurun , tambe nos a mira e hóben kantante Edward Martinez. Mes ora nos a haña informashon ku ámbos kantante ta forma parti di e banda nobo ku ta “Génesis”. Pa loke ta trata e piesa nobo di Tom Zimmerman, eaki ta un komposishon i areglo di Ike Jesurun, i su titulo ta  “Un dushi yobida”. Mas den siman ‘E Mulina’, ta bin aden ku mas informashon rondo di e agrupashon musikal nobo “Genesis”, paso nos tin informashon ku tin mas moveshon na kaminda.