Vehíkulo na kandela den Punda

69
Bombero a yega pa asina por a dominá e kandela.
For di na un distansha por a mira basta huma.
Willemstad— Mester a pidi presensia di pagadónan di kandela pa yega ku urgensia den Punda pa un vehíkulo ku  tabata na kandela.
Kandela a dominá e parti padilanti di e vehíkulo.

Ayera den oranan di atardi a pidi asistensia di e personal di Brantwer pa presentá ku urgensia di Punda ta mas eksakto riba e lugá pa stashoná outo ku tin nèt pariba di e edifisio unda ántes Stichting Studie Financiering tabata situá pa un vehíkulo ku tabata na kandela. Algun persona hasiendo uso di hèmber ku awa a trata di dominá e kandela ku tabata konsentrá mas na e parti di motor di e vehíkulo pero sin e resultado deseá.

E outo ku  tabata na kandela.

Pagadónan di kandela ku a keda avisá a kore yega mesora na  e sitio i a kuminsá ku e trámitenan pa asina por a dominá e kandela mirando ku den banda di e vehíkulo ku tabata kimando tabatin mas outo stashoná. E doño di e vehíkulo a splika ku e la yega na e sitio stashoná su vehíkulo pa asina por a kana bai bin no masha leu pero a keda avisá ku su vehíkulo lo tabata na kandela. Bomberonan a logra di dominá e kandela i a evitá ku esaki por a ekspandé i destruí e vehíkulo mes por kompletu i tambe otronan ku tabata stashoná den e besindario.