Gobièrnu mester pidi Merka dispensashon  pa PDVSA

Pa por yega na akuerdo ku e venezolanonan:

318
Refineria Isla: Letter of intent a bai pa PDVSA tambe. E problema ta bai sinta ora di firma MOU, paso promé ku yega dje leu ei Gobièrnu di Kòrsou mester pidi Merka   dispensashon pa Venezuela.
WILLEMSTAD—Un dje empresanan ku a entrega nan proposishon ta PDVSA kende for di 1986 ta manehando Refineria Isla.

Pa lokual ta trata e letter of intent nan ku a sali for di Kòrsou tin tambe ku a bai pa PDVSA. Den e kombersashon ku Vigilante a sostené ayera ku Sr Chunky Delannoy nos a para ketu na e posishon di PDVSA. Manera ta konosí Merka a sanshoná gobièrnu di Nicolas Maduro. Merka ta kla pa tuma medida kontra tur pais ku hasi negoshi ku PDVSA.  Pa suavisá e situashon pa Kòrsou ta asina ku Gabinete Rhuggenaath a risibí dispensashon  for di Merka pa produktonan ku ya ta den tanki di Refineria Isla. Ta asina ku nos a risibí un waiver kaminda ku Curoil por a komersialisá e produktonan pa merkado lokal. E promé waiver tabata 2 di mei, miéntras ku e di 2 tabata 8 di ougùstùs. Sr Chunky Delanooi a rekonosé na nos ayera ku no tin masha produkshon ku a tuma lugá den e periodo di 2 di ei pa 8 di ougùstùs.  Pa e kontrakt multi anual ku kier firma pa e kompania ku kier manehá Refineria Isla ta asina ku PDVSA lo no ta interesá pa solamente hasi negoshi pa e merkado di Kòrsou. Ta aki e situashon tei bira difísil na momentu ku tin di skohe 1 of 2 kompania pa firma e MOU den òktober konforme e planifikashon di PMO. Den e kombersashon ku nos a sostené ku Sr Chunky Delanooi ayera nos a para ketu na e punto i el a rekonosé ku tin trabou pa ser hasi ya ku mester pidi Merka eksepshon pa PDVSA.  El a indiká nos bon kla ayera ku gobièrnu lo tin di pidi dispensashon, pero ku si lo haña esaki ta algu otro. E kontesta aki por duna kaba indikashon den ki di direkshon por bai ku PDVSA. For di e kombersashon ku nos a hiba ku Sr Chunky Delanooi nos por a saka afó ku lo no tin sentido pa yega na MOU ku PDVSA si Merka no hasi eksepshon pa nan. Ta asina ku na e momentunan aki ti un konflikto serio e entre Merka ku Venezuela debí ku presidente Donald Trump kier pa Nicolas Maduro baha.•