Kòrsou ku ‘no hit no run’ riba Oustralia na Williamsport

351
Liga Pabou Little League ku ta na Williamsport.
WILLEMSTAD—E selekshon di beisbòl Little League, Liga Pabou di Kòrsou, ku ta kampion di Karibe i den representashon di Karibe den kampionato mundial na Williamsport, a debutá ku bon pia ayera.

Esaki na momentu ku nan a enfrentá e ekipo for di Oustralia i a logra triunfo pa blankeo, propinando Oustralia un nòkout, estilo sapatu blanku den dominó, ku skor di 11-0.

Tabata wega ku a bai 4 entrada, unda e picher Shendrion Martinus, a habri i tira un ‘no hit, no run’, pa Kòrsou.

Nos muchanan tabatin apénas 3 oportunidat pa bati, unda den promé entrada nan no ta logra anotá, pa seguidamente tabatin un segundo entrada grandi anotando na 7 okashon i a konkluí e resultado den nan terser i último oportunidat pa bati ayera, anotando na 4 okashon, den entrada ku Curley Martha tabatin un bataso di 4 skina, ku tabata bon pa 2 kareda.

Nos muchanan a duna tremendo partido, anotando 11 kareda, ku 10 hit i a hunga sin hasi eror, lagando un bon impreshon atras i ta halando basta atenshon den e kampionato mundial ku ta konta ku partisipashon di 16 ekipo. Oustralia no a anotá i tampoko konektá hit i a hasi 3 eror.

Miéntras tantu ku aktuashon di e kècher Jurdrick Profar ayera, e la bira e di 3 ruman ku ta hunga den un mundial di beisbòl Little League. Esaki despues di Jurickson i tambe Juremi.