Pa nan respektivo logronan durante weganan Panamerikano na Peru…. OMB ta premia e medayistanan Óscar Collazo i Yankiel Rivera

112
OMB a premia e medayistanan Panamerikano Óscar Collazo i Yankiel Rivera.
SAN JUAN – E Organisashon Mundial di Bokseo (OMB), presidí pa Francisco ‘Paco’ Valcárcel Mulero, resientemente a selebrá un evento spesial unda nan a rekonosé e prestashonnan di e bòksdó nan di Puerto Riko Oscar ‘El Pupilo’ Collazo i Yankiel ‘Doctorcito’, pa nan respektivo logronan durante e weganan Panamerikano ku a tuma lugá na Lima, Perú.

Óscar Collazó durante e weganan Panamerikano di Lima, a gana medaya di oro den e kategoria di 49 kilo, miéntras ku Yankiel Rivera a optené medaya di bròns den e kategoria di 52 kilo. Durante e aktividat sumamente bon bishitá, OMB a entrega ámbos bòksdó ekiponan deportivo, un elegante faha konmemorativo igual na esnan di OMB i tambe algun donashon efektivo. E entrenadonan Carlos Espada i Roland Valcárcel tambe a risibí ekipo deportivo di entrenamentu.

“Esaki ta un momentu importante pa nos dediká na e dos héruenan aki. Dos bòksdó a biaha pa Lima i tur dos a bolbe kas ku medaya. Nos ke demostrá nos apresio i ke duna un man mirando ku nan tabatin algun gastu pa por partisipá na e kompetensia aki. Nos sa di e sakrifisio di nan, di nan famia, entrenadó i tur ku di un òf otro forma a kolaborá pa nan ta aki awe. No ta ku palabra bunita i rekonosementu so ta basta, pero mester yuda nan di algun forma i nos ta hasi esaki di e forma aki awe. Mi a komprondé ku, e dia ku nan disidí na dal e stap pa drenta profeshonalismo, nan tin bon chèns di logra kompetí pa títulonan mundial i ta dependé na nan mes pa por logra esaki”, asina e presidente di OMB, Valcárcel Mulero, a komentá na e invitadonan presente.