Yegada di Juninho den selekshon tei sakudí posishon

646
Kasi: kompará ku su ruman Leandro (riba e foto), Juninho su frekuensha di pia ta mas lihé, pero na kreatividat tin poko diferensha entre nan.
Amplio: ku yegada i Bacuna II, Remco ku problema di luho ta oumentá.
Punda—E mucha di Leeuwenborg Groningen, Juninho “Baca” Bacuna tei trese tur kos pa selekshon nashonal di Kòrsou, alegria, stabilidat pero tambe un poko mal kontentu. Direktor tékniko, Remco Bicentini, ku e nivel di futbòl haltu di Juninho, ta bai tin hopi problema di luho.

Bacuna di 21 aña, ta e siguiente nivel di nos selekshon, manera Vigilante ya a skibi e por move riba ámbos banda di tereno i tambe den tur posishon, te na nivel di medio kampo. Un berdadero talento ku for di su dianan infantil den FC Leuwenborg na Groningen, ya tabatin boleto grátis pa futbòl máksimo den nort dje pais. Yegada di Bacuna den nos plantel nashonal di futbòl, riba papel, ta rankia Kòrsou den tòp di Karibe i sup tòp di Concacaf. E ábil yu di e legandario John Bacuna, ta mes òf mas mihó ku su ruman mayó, Leandro. Anke nan estilo di futbol ta kasi komparabel, Juninho su frekuensha di pia ta poko mas lihé ku Leandro. Pa Remco Bicentini nada mas sino doló di kabes.

E problema ta bira ku unda Remco pone Juninho hunga, un hungadó ta bai banki. Biniendo for di FC Groningen komo bolante, Juninho a subi yerba bèrdè pa Huddersfield na Inglatera komo bolante riba ala drechi i mei mei ku ámbos pia pero tambe a pone hunga riba lateral derechi. E bentaha di Juninho pa Remco ta bira ku e por “Baca” riba tur posishon di debilidat na momento di leshon den ekipo. Ku otro palabra, Remco su problema pa “skùif” hungadó ta bira muchu ménos awor ku Juninho ta den “La Famial Azul”.

E posibilidatnan mas grandi naturalmente ta keda den liña bolante. Juninho por kuminsá na banda derechi òf na banda robes afó den liña di bolante unda e posishonnan fiho di tantu Gevaro Nepumuceno, Sontje Hooi i Jarzinho Antonia ta na duda. Ku Brandley Kuwas, ta fiha na unu dje posishonnan ei, Juninho lo okupá esun habri, sea na man drechi òf robes. E di dos opshon ta pa hunga mei mei semi atras ku su ruman, Leandro Bacuna den posishon di de Nooijer. E kombinashon di “Baca pa Baca”, lo ta unu hopi atraktivo di mira i komo ruman e komprendementu i reakshon lo ta mas efektivo. Den e konstelashon aki, e selekshon lo por disfrutá di dos bolante ku ámbos abilidat di ta kreativo i efektivo defensivamente. Leandro Bacuna den Gold Cup a mustra su prekupashon di no sali muchu ofensivo na momento e ta kompania mei mei pa un bolante den kual por karga e responsabilidat huntu kuné. Remco por uza e posibilidatnan di Junhino den defensa tambe. Tur kos ta dependé si e Direktor Tékniko tei adaptá su sistema di wega abase di su kontrinkante òf su bolsa di hungadó. Riba lateral drechi na posishon no 2, tambe Juninho a mustra tur abilidat nesesario. Den Huddersfield e la komplasé su direktor tékniko Jan Stiewert na e posishon aki den un viktoria kontra di Wolves. Stiewart den mesun wega a uza Juninho riba lateral drechi i despues den bolante mei mei den parti ofensivo. Pa Bicentini esaki ta un desishon difísil. Úniko manera ku Juninho por hunga einan ta si akaso e kapitan di ekipo, Cuco Martina ta leshoná òf mester hunga mei mei ku Lachman. Kisas no un mal opshon tampoko pa sali kontra di Haiti na Ergilio Hato asina, pues ku Juninho riba ala drechi pa laga Cuco fortalesé Lachman mei mei i trata na evitá e daño ku e dos “diabelnan” haitiano Pierrot i Nazon por hasi.  E sanger di Boka Sami sigur lo mustra su presensha un biaha mas den nos futbol. Ku e dosnan di John sea den bolante of defensa, Kòrsou por tin ménos prekupashon pa su siguiente rònt di Kopa di Nashon. (skibi pa Lilo Sulvaran)