3 dje 5 médikonan KNO tin mas ku 65 aña di edat

A tuma medida sin pensa riba remplaso:

1233
Wallid Elhage: El a konfirmá ku nan a yega na akuerdo. E no por komprondé e mal konseho ku nan a duna Minister Romer.  
WILLEMSTAD—Algu ku sigur a hala atenshon último dianan ta e echo ku pa 1 di yanüari 2020 lo a drenta na vigor ku dòkternan ku tin 65 aña di edat of mas lo no ser pagá mas pa SVB.

E medida aki di parti di SVB a pone ku Asosashon di dòkternan a drenta akshon mesora. Mas ku djabièrnè ei nan a sinta na mesa ku esnan ku kiere a tuma medida i yega na akuerdo. Mester bisa ku tabata eminente yega na akuerdo tumando na kuenta ku pa lokual ta trata KNO, esta dòkternan di nanishi i garganta ta masha skars riba nos isla. Ta asina ku tin apénas 5 na Kòrsou di kua 3 ta bula 65 aña di edat. Redakshon di Vigilante a kombersá ku Dr Wallid Elhage kende ta na kabes dje asosashon. El a konfirmá na nos ku djabièrnè ei nan a yega na sierto akuerdonan. Total lo tabatin 22 dòkter ku lo a kai for di e sistema di pago di SVB. E akuerdo ku a yega na dje ta ku kada dòkter mester splika kiko nan tin komo debe i abase dje informashon aki traha un areglo ku SVB. Redakshon di Vigilante a kombersá ku un konosido dòkter kende a mustra nos ku den su kaso lokual ku e tin na debe ta keda kanselá den 3 aña. Ku otro palabra esun dòkter aki lo stòp di risibí pago di SVB pa aña 2023. Ta asina si ku e sa di otro dòkternan ku tin un ruta largu mas pa bai ku pago di nan hipotek. Konforme e areglo tur kos ta dependé dje situashon di kada dòkter ku a bula 65 aña di edat. Ta kada dòkter apart mester entrega nan situashon finansiero riba papel i indiká den kuantu aña nan por kaba di kumpli ku esaki. Nos a drenta den kontakto ku dr Wallid Elhage i mester bisa ku e mes no por kaba di komprondé ken por a konsehá minister Suzy Camelia Römer malu asina. El a indiká na nos ku lokual ta e problema di nan ta e spesialistanan ku nan kier tuma medida kontra dje. E pensamentu ta ku spesialistanan ta gana bòshi plaka. Nan ta brua omzet ku inkomen. E no por komprondé loke ku nan kier a hasi entrante 1 di yanüari 2020. Den su kaso e no tin problema ku e medida, paso e ta traha bai, pero e ta prepará pa e kalidat di kuido ku lo keda duna, paso segun dr Wallit Elhage lokual ku nan kier a hasi ta skùif 170 mil pashènt ku tin di ser atendé pa e gruponan ku no a yega e edat di 65 aña. Hasta ta asina ku el a mustra nos riba e echo ku dunando dòkternan kontraktnan di 2 aña lo no hasi e merkado atraktivo pa nan. Pa awor nan ta kontentu ku e akuerdo ku nan a yega na dje, pero e ta lamentá si ku e asuntu aki mester a ser trata dje forma aki.•