Edsel Gumbs i su testigu ta kai den korte

1317
Dual: testigu den kaso Fonseca a bira kontroversial den kaso Jamaloodin
Punda– E informante anónimo ku a deklará na èks hefe di VDC inkriminando Jorge Jamaloodin den kaso Maximus,  a wòrdu rechasá pa korte.

Pero e testigu aki for di inisio tabata na duda. Hasta e servisio di inteligensia, VDC, unda Edsel Gumbs tabata hefe, no por a identifiká ken por tabata e informante misterioso. Deklarashon ku e informante en kestion a hasi na Edsel Gumbs a  wòrdu aseptá pa korte den kaso kontra di Fonseca. Pero den e mesun kaso aki, korte a duna su “opinion adelantá” den e veredikto di Nini Fonseca ku ta Jorge Jamaloodin a paga i duna órden pa asesiná Helmin Wiels riba 5 di Mei 2013.

Riba 31 di mart 2017, Edsel Gumbs a wòrdu interogá dilanti un wes komisario. Gumbs a deklará lokual e informante a bisé. Segun e informante, despues di e di dos atrako riba oloshi na Renaissance, e atrakadó a bai kas di Jorge Jamaloodin pa bende e oloshinan. Jorge  Jamaloodin lo no tabatin interes den e bolsa di Oloshi pero lo a puntra defuntu Florentina si e por asesiná Wiels. Despues, Florentina lo a bini bèk ku Fonseca.

Segun Gumbs, e informante a bini serka dje pasobra el a bai RST unda nan a trat’é malu. Pero, awor ta sali na kla ku e informante aki nunka no a bai RST. E funshonario di RST, R. Blansjaar riba 10 di aprel 2017, a traha un proses ferbal. Den e prosès ferbal e ta bisa ku
nan no por dedusí ku no tin niun informante  kende lo a bini serka nan na RST den kaso Maximus i ku nan sistema di informashon no por identifiká. RST pues no konosé e informante di Gumbs.

Esaki ta nifiká ku ni VDC, ni RST, ni Ministerio Públiko, ni fiskal Gert Rip no por identifiká e informante ku e testigu  Edsel Gumbs ta papia di dje. Pero pa motibunan ainda deskonosí, Korte Superior a aseptá e informante i awor korte den Promé Instansha kontra di Jamaloodin a rechasá e testigu.

E informante aki tabata sentral den veredikto di Fonseca i alabes a kologá Jamaloodin den korte sin un tratamentu. E informante en kestion awor ta den duda pasobra korte den kaso di Fonseca a uza e testigu aki unda nan a bisa ku ta Jorge Jamaloodin paga pa asesiná Wiels. Pero den e kaso di Jamaloodin mes korte a bisa ku e testigu aki i deklarashon di Gumbs no ta konfiabel! Un kontradikshon bastante konfuso.•