Ken ta proteha nos kontra e huesnan aki?

Defensor di Jamaloodin na palabra:

308
Segun Peppie Sulavaran: For di e punto di bista estriktamente hurídiko, e pruebanan kontra George, ta mas ku kuestionabel.
Willemstad—–Ta un derechi fundamental di tur ser humano pa wòrdu trata komo inosente te ora un hues disidí definitivamente riba su kulpabilidat i esei wòrdu legalmente i konvinsentemente proba. E derecho humano aki ta prohibí Korte di Hustisia pa ekspresá su mes na un manera ku ta krea e impreshon ku ya nan disidí kaba ku e persona ta kulpabel i tin komo meta tambe pa evitá ku e hues ku ta bai husga e persona, ta wòrdu influensia negativamente kontra dje. Den kaso Maximus Jamaloodin ya adelantá a wòrdu konsiderá i trata komo kulpabel pa Korte di Hustisia.

Komunikado di prensa kompletamente fo’i sla di Korte di Hustisia
E Korte di Hustisia aki a saka un komunikado ku nòmber i fam, kaminda nan a indiká Jamaloodin komo esun ku a duna órden pa mata Wiels, te hasta promé ku su kaso a tuma lugá den mes un korte. Ku esei ya nan a seya su destino. E étika profeshonal di huesnan mester a evitá ku algu asina lo por a pasa. Aparentemente e nivel di étika profeshonal den e korte aki no ta masha haltu. Jamaloodin ya den e komunikado di hinter e órgano Korte di Hustisia, envia ku nan logo ofisial, dia 13 di yüli 2018, ya a wòrdu kondena públikamente komo outor di e morto di Wiels. Sin su proseso kuminsá, ya a wòrdu disidí kaba ku e la duna òrdu, a negoshá i e paga pa mata Wiels. E prueba lo tabata basa riba e kuater pilarnan ku a usa pa kondena Nini Fonseca. Deklarashon di Kuwas, deklarashon di e èks hefe di VDC, Gumbs, sms i un supuesto testigu ku lo a mira negoshashon entre Nini i George. E último aki no ta nada mas ku un mentira pa despista públiko. Den hinter e file di Maximus, no tin niun testigu ku a papia nada di mira negoshashon enter Nini i George. E testigu ku nan ta referí na dje ta un persona ku limitashon mental i ademas adikto, ku lo a bisa di a tende di un persona ku a fayesé, algu di un supuesto negoshashon. Esaki ta algu kompletamente otro ku presensia negoshashon. Miéntras tantu a base di e kondena inhustu di djabièrnè pasá, Jamaloodin tin mas duda ku nunka, di por konfia, ku magistradonan individual den e pais aki lo husga su kaso honestamente i korektamente.

E karnisero ku ta huzga su mes karni
A base di e komunikado di prensa ariba menshoná prosedente di Korte komo instituto, defensa a entrega un petishon ku yama ‘wraking’ kontra e huesnan di e korte no imparsial aki. Esta, pa kitanan for di e kaso. Pa nos sorpresa, nada ménos ku un hues ku a kondena Nini i riba kende su desishon e komunikado di prensa kondenabel ta basa, a disidí di trata e asuntu su mes komo presidente di e kombinashon i a pone e petishon un banda sin nunka ela  wòrdu trata. Ta remarkabel i ta duna muestra di arogansia sin limit’é, ku un hues ku tabata enbolbí den e husgamentu di Nini, a base di kual a kondena George públikamente sin un huisio tuma lugá i riba kual e komunikado di prensa ku a kolog’é ta basa, mes ta bin sinta i husga nan fayo. Lo ta pa e protehá su mes i su koleganan ku ta responsabel pa e abusu aki kontra un persona, promé ku e la haña un huisio. E pregunta ta, si e por a tuma un desishon imparsial. Den e pregunta mes tin e kontesta. E echonan ariba menshoná kometé pa e korte aki, no ta kuadra den niun estado di derechi. E problema ta ku na Kòrsou, alrededor di 10 hues ta okupá nan mes normalmente ku husga kasonan penal i miéntras tantu un mayoria ya a wòrdu enbolbí den e morto di Wiels. Pa kolmo nan tur den promé instansia i apelashon, tur huntu ta sinta den mes un edifisio den mes un gang i ku un sala di kòfi kompartí . Bo mester ta para duru den bo sapatu pa bo resistí i kontra arestá esnan ku diariamente bo ta anda kuné, den e kaso di mas grandi ku hamas Kòrsou a konosé. Pero ni maske kon difísil e situashon aki por ta, tur hues tin e obligashon di duna un desishon independiente i supstansia i motivá, dikon e la usa sierto material di prueba i dikon e ta haña nan konfiabel òf no. Na nos opinion e kondena di Jamaloodin ta karesé un motivashon supstansia i motivá. Datonan inkorekto ku  a wòrdu obhetivamente establesé i ku ta kontrolabel a wòrdu simplemente neglishá i pone un banda.

Kontra aktitut arbitrario i midimentu ku diferente midi dor di huesnan, niun hende no por bringa
For di e punto di bista estriktamente hurídiko, e pruebanan kontra George, ta mas ku kuestionabel. Tres eksperto Ulandes renombrá i hopi respetá na Ulanda a traha rapòrtnan ribe e material di prueba kontra Jamaloodin. Esta profesor Ton Derksen, Profesor Peter van Koppen i mr. Dr. Bas de Wilde, independientemente for di otro, nan tur a yega na e mesun konklushon, esta ku e pruebanan presentá no por karga un kondena paso nan no ta di peso. E rapòrt di e ekspertonan aki a wòrdu entrega na e hues huntu ku e rapòrt investigativo di e ofisina di investigashon di echo A FONDO i a wòrdu hasi parti integral di e dokumentashon di e kaso. Den e sentensia e hues no ta papia ni un palabra tokante esakinan i pues no ta desbaratá nan tampoko.

P’esei so kaba e kondena di George di djabièrnè pasa ta konfirmá ku tin algu basta robes a tuma lugá. E kos mas piò ta, ku apesar ku e la wòrdu kondena públikamente pa un kuerpo di hues hasta promé ku su kaso a kuminsá,  den su kaso a wòrdu proba, ku e pruebanan ku nan a usa e tempu ei pa konden’é públikamente pa komplisidat, no por karga un kondena. Nan a resultá inkorekto, inkonsistente i no ta sostené otro. P’esei e resultado no por tabata nada otro ku liber di kulpabilidat pa komplisidat (medeplegen). Pero hues a disidí di bent’é awor riba ‘uitlokking’ (provoká). Den e sentensia di djabièrnè tin prueba ta wòrdu usa ku Korte Superior ya kaba a denominá komo inkonfiabel den e kaso di Nini. Pasobra nan a saka e komunikado di prensa reprochabel tin hopi den wega pa e korte aki. Si persekushon di George faya, korte i tur e huesnan ku rason lo pèrdè kara. Awor a bin ku dos testigu, ku no a usa den kaso di Nini, atrobe di ‘horen zeggen’, remarkabelmente, atrobe hende ku a tende di hende morto i ku pues no tin fuente kontrolabel. Un di e testigunan aki, ya kaba Korte Superior a denominá komo inkonfiabel. E otro, ta un persona ku tambe ta di ‘horen zeggen’ prosedente atrobe di un fuente ku tampoko no tey mas. E persona aki na 2013 i 2014 a deklará di no sa nada mes di e kaso, pero ku komo sospechoso di labamentu di plaka despues a bin sera un akuerdo lukrativo ku OM, kaminda nan a dun’é un tereno regalo ku a wòrdu kumpra ku sèn prosedente di krímen si plaka brutu cash. E mes un dia ku e la firma e akuerdo ku OM i akseptá su regalonan ku ta proveniente di krímen, e la demostrá un don, ku ningun otro hende no tin. Si memoria a oumentá mes ora i drástikamente i riba mes un dia den 2017, otro for di tur e añanan promé, di biaha si tabatin informashon inkriminante tokante Jamaloodin ku e la haña di un fuente ku tampoko no tey mas.

Sin huesnan hustu no por tin un proseso hustu
Ku kosnan lo a bai bira difísil pa nos, fo’i kuminsamentu nos tabata sa esei. Pero promé ku e kos aki kaba, ya un gran parti di e daño lo a wòrdu hasi. E pruebanan ‘nobo’ aki kontra Jamaloodin tambe nos lo trata i refutá públikamente i den sala di korte, meskos ku e otronan. Jamaloodin no tin intenshon di sinta 28 aña den prizon pa algu ku e no a hasi. Pa esei sosodé un proseso hustu pe ta indispensabel.

Nan nòmber di ekipo di defensa di Jamaloodin
Eldon ‘Peppie’ Sulvaran•