Rekoudashon elegante Franses pa 15 aniversario di Ride for the Roses

Jazz, biña i pasapalo Franses i findishi di obranan di arte

80
Dia 19 di sèptèmber 2019, den e luna di kolekta di Fondo Prinsesa Wilhelmina (PWF) ta tene un evento úniko pa rekoudá fondo na Villa Maria den kuadro di e di 15 aniversario di Ride for the Roses. E wéspetnan por gosa henter anochi di jazz Franses, biña Franses i pasapalo Franses den un ambiente kaloroso i elegante di un bistro. Kulminashon di e anochi ta e findishi di arte kaminda lo bende 15 obra di arte, entre nan un grabado di Picasso. E loke lo rekoudá e anochi ta bai pa aktividatnan di informashon i di kuido pa e grupo kresiente di pashènt di kanser na Kòrsou.

E idea pa e rekoudashon úniko Franses ku un findishi di arte ta bini di Maya van der Werve, un periodista konosí di radio ku gusta arte tambe, Fransien van Haaren ku hopi aña ya ta aktivo pa diferente meta sosial na Kòrsou, i Sinuhe Oomen, un kuratòr inspirá di arte ku a traha hopi tempu na Landhuis Bloemhof. Van Haaren: “Pa 150 florin pa persona nos ta brinda 150 wéspet un anochi Franses inolvidabel i nos ta rekoudá fondo pa kuido di pashènt di kanser na Kòrsou. Asina nos ta kontribuí nos granito na e aktividatnan anual di Ride for the Roses.”

E findishi di arte ta den man di e duo eksperensiá Lauw Jacobs i Marro Pietersz ku semper realmente ta logra di monta un fiesta. Lo bende na findishi kuadro i skulptura di artistanan lokal konosí, entre otro Luigi Pinedo, Philip Zanolino, Herman van Bergen, Yubi Kirindongo, José Capricorn i Brigit Wawoe, ku pa multiple rasonnan ta atípiko i masha spesial. Kada obra, segun kuratòr Oomen, tin su mes storia ku nan lo splika e anochi ei. Loke ta duna e findishi mas realse ta ku e wéspetnan por bit kontra otro pa un grabado di Picasso i un kuadro di Joan Miró.

Direktiva di Ride for the Roses i Fondo Prinsesa Wilhelmina ta risibí e evento aki di rekoudashon Art, Wine & Jazz fundraising ku brasa habrí, i pa e anochi aki lo dekorá Villa Maria masha bunita. E anochi ei e negoshi di biña Servir Frais lo perkurá pa bunita biña; lo tin dushi keshi, delisia i otro tapas Franses. E banda ku ta toka jazz Franses bibu ta bou di guia di Ralph Durgaram. Durante e anochi lo perkurá pa sufisiente espasio pa stashoná outo i seguridat i entre otro Kuido di Monumento, Servir Frais, Securitas, Ixora, Tovari, EWT i Tibbaa ta patrosiná e evento úniko aki pa rekoudá fondo.

E karchinan all inclusive di 150 florin pa persona ta opetibel na ámbos supermerkado di Van den Tweel, Bruna, Mensing’s Caminada, 24 uur uit de muur, Servir Frais (kaminda na sèptèmber por kumpra tambe kahanan di biña Wine for the Roses!), Winebar JOY i serka direktiva di Ride for the Roses. Online interesadonan por akudí na www.bit.ly/ArtWineJazz. Ku e rekoudashon Franses aki i e findishi di arte e inisiadónan ta spera den kuadro di e 15 aniversario di Ride for the Roses na Kòrsou di por generá 50 mil florin pa stimulá konsiensia i e sosten asina nesesario pa hendenan na Kòrsou ku kanser.