Shofùr envolví den aksidente unda mama i yu a pèrdè bida prolongá

E lo mester a pasa dor di lus kòrá ku velosidat basta haltu

169
E shofùr ta wòrdu sospecha di a pasa dor di lus kòrá kual ta un delito kastigabel pa lei.
Sospechoso ku ayera su detenshon a keda alarga.
Willemstad—- Ayera den oranan di mainta e shofùr envolví den e aksidente ku dos morto ku a tuma lugá riba Helmin Wiels Boulevard a keda presentá dilanti wes komisario na unda a alarga su detenshon ku ocho dia mas.
Vehíkulo ku e tabata manehá a keda konfiská.

Tabata djabièrnè 16 di ougùstùs 2019, alrededor di 06.30’or, Sentral di Polis a risibí informashon di un aksidente di tráfiko ku a tuma lugá na Helmin Magno Wiels Boulevard na altura di De Savaan.

Na e markanan di brek riba kaminda por a dedusí ku e tabata kore ku un velosidat basta haltu.

Na yegada di e unidat, nan a bin topa un mama i yu ku tabata gravemente leshoná.

For di investigashon preliminar ku polis a realisá na e sitio, a sali na kla, ku e mama ku na e momento ei tabatin e yu den su brasa a bai krusa kaya, nèt na momentu ku un vehíkulo tabata aserkando, biniendo for di Julianadorp bayendo den direkshon di Otrobanda.

I e vehíkulo aki lo mester a alkansá ámbos persona. E mama a keda benta na suela miéntras e yu a keda pega riba e tapa di mashin di e vehíkulo.

Alrededor di 07.30’or dòkter di polis a konstatá morto di e mama i e yu ku a bin fayesé na e sitio di aksidente.  Siguiendo ku e investigashon na e sitio mes  polis a detené e shofùr, J.O.C., di 39 aña, i a konfiská e vehíkulo pa mas investigashon.  Na e rastronan di brek ku a keda tras e ekspertonan di tráfiko a dedusí ku sigur e vehíkulo tabata move ku un velosidat basta haltu. Tambe a haña e informashon na e sitio ei mes ku e outo sigur mester a pasa dor di lus kòrá i ku debí na e velosidat haltu no por a wanta brek pa evitá e aksidente. Ayera e sospechoso a keda presentá dilanti wes komisario pa asina por a evaluá su detenshon. Wes komisario a haña ku su detenshon ta na su lugá i mesora a prolong’é ku ocho dia mas. E punto nan mas kardinal ku ta pisa den detenshon di e sospechoso ta e delito di a pasa dor di lus kòrá bai okashoná e aksidente i tambe di tabata manehá un vehíkulo ku un velosidat mas haltu ku ta preskribí riba e karetera ei.