Testigu B5: Wiels a tip polis riba robo di oloshi i bara di oro

4971
Punda—Ayera wes mr. Lieshout a konfirmá durante su veredikto den kaso Maximus, ku Helmin Wiels tabata papia ku hustisia i a duna tip riba aktornan den baho mundu, entre nan defuntu Luigi Florentina. E informashon aki ta unu balioso, pasobra semper Ministerio Públiko a ninga ku esaki tabata bèrdat.

De fakto, un persona kende Wiels tabata papia kuné sigur ta eks hefe di RST, sr. Eric K.. Semper tabatin e sospecho ku e funshonario aki tabata sa dje testimonionan di Wiels, pero ku nunka no a yega di traha un prosès ferbal di dje. Di un manera masha misterioso, Eric K a bira konsehero di Nelson Navarro despues ku Wiels a bin fayesé. Nelson Navarro nunka no a komprondé ta kon bini e hòmber Erik K., kende tabata hefe di RST te ku dianan ku Wiels a fayesé, a bira su konsehero despues. Esaki ta lokual e eks minister a duna di konosé aña pasa durante un reakshon riba e pregunta di Vigilante.

Segun Nelson Navarro e no sa tampoko ta ken a tuma e desishon pa laga eks hefe di RST, Erik K. bira su konsehero. E desishon di hasi Erik K. konsehero di Nelson Navarro, segun un otro eks minister di hustisia, Kade Wilsoe, tabata unu di Helmin Wiels, kende a papia ku K. riba su posishon nobo despues di baha ku team chef na RST. “Mi a taha Helmin di papia ku RST, komo eks minister di hustisia mi sa kon nan ta traha”, Wilsoe a bisa durante un dokumentario riba asesinato di Helmin Wiels. Segun Wilsoe, Helmin Wiels a konfirmá e motibu dikon Erik K. tabata papia kuné. Wiels a bisa Wilsoe, ku Erik K.  tabata ke un posishon komo konsehero di minister. E temporada ei, Pueblo Soberano no tabatin e kartera di hustisia mas.

Dikon Wiels lo a perkurá pa Erik K. bira konsehero miéntras e tabata boga pa eliminá influensha Ulandes? E rumornan ku Wiels tabata papia ku RST i Erik K. , a bin kai den grupo kriminal di atrakadó nan di oloshi. E informashon tabata bisa ku Wiels ta trahando un dil ku RST pa sera Jorge Jamaloodin pa kompra di oloshi hòrtá.  P’esei pa tal motibu, nunka no por separá e morto di Wiels for di oloshi nan hòrta. Segun Gert Rip, e planeamento riba morto di Wiels a start riba 2 di yüni 2012, despues ku defuntu Pretu Florentina, kende a plania e morto di Wiels, a bai kas di Jorge Jamaloodin ku Nini Fonseca. Esaki a sosodé riba e anochi spesífiko, despues ku e grupo a hòrta oloshi na mall di Renaissance. E lek ku ayera wes mr. Lieshout a papia di dje, tabata prosedente di RST mes. Esaki sea konsiente òf inkonsiente. E grupo kende tabata bende oloshi hòrtá, ya tabata planiando kon pa bai asesiná Helmin Wiels.