30 aña di prizòn pa dòbel i intento asesinato

999
E la baha su kabes despues ku wes a dikta sentensia.
WILLEMSTAD,—- Andrew Oseana a skucha un kastigu di 30 aña prizòn ayera kual ta igual na loke Ministerio Públiko a pidi pe, pa un kaso di dòbel i intento asesinato. Tabata un kaso unda e akusado lo mester a drenta un barberia i los tiru riba 3 persona.

Tabata 23 di mei di aña pasá ku polisnan lo a bai na un barberia den Souax pa un kaso di dòbel i intento asesinato. Esaki despues ku lo mester tabatin un konflikto entre e akusado i e víktima Tielman pa motibu di un debe ku e víktima lo mester tabatin atrasá.

E víktimanan di fam Molina i Pedro a bin pèrdè nan bida pa e problema ku Oseana tabatin ku Tielman, sin tabatin motibu segun e vitrina Tielman. E akusado lo a drenta den e negoshi, unda lo e tabatin un shòtgùn den su man. Tabata aki ku lo e mester a los tiru riba e tur 3 víktima, ku konsekuensia ku di 2 nan a pèrdè nan bida.

Esaki despues ku ya el a presentá na e negoshi pa pidi su plaka, miéntras huntu ku e víktima Tielman lo el a kana sali for di e negoshi, unda e víktima lo a bai bèl un persona pa trese plaka pa e por paga Oseana. E akusado despues di algun ratu di warda a rabia, unda el a bisa ku awor si e la kansa i kuminsá los tiru den e negoshi.

Oseana primeramente a bisa su pareha ku e tabata na e sitio, na momentu ku e tiroteo a tuma lugá unda den sala di korte e la kambia e deklarashon. El a bisa ku su pareha no a komprondé kiko e tabata kier men riba e dia en kuestion. Segun Oseana ku el a bisa su pareha ku un dia promé e tabata na e sitio.

Loke sigur a hala atenshon den e kaso, ta e sistema kon e akusado a tira e víktimanan, unda su propio kolega lo a deklará ku esaki ta un strategia ku nan sa train pa nan trabou. Segun e eks kolega ku e akusado tabata instruktor di tira ku shòtgùn. Loke tambe a hala atenshon ta e echo ku e sospechoso lo mester tabatin polvo riba su man i paña, esta ku el a tira.

Riba esaki te dia a trata e kaso, e akusado lo a deklará ku algun dia promé el a bai trein tira i ku ta esaki por ta e motibu dikon e tin polvo riba su man. Ministerio Públiko a pidi 30 aña di prizòn pa e akusado, pa dòbel i intento asesinato. Ayera wes a honra petishon di Ministerio Públiko i kastigá Oseana na 30 aña.