Amigu di Tera tin konstrukshonnan di 4000 kas na Wechi wantá

129
Wechi—Tin sierto kosnan ku ta pasando na Kòrsou ku bo no ta kaba di komprondé.  FKP ta para kla di nan parti pa sigui ku e konstrukshon di kasnan na Wechi.

Lokual ku na e momentunan aki tin konstrukshon dje 4 mil kasnan wanta ta e kaso den Apelashon. Ta asina ku den Korte di Promé Instansia e veredikto a kai na fabor di FKP. Amigu di Tera a apelá e veredikto i mester bisa ku den luna di òktober esaki lo keda tratá den Apelashon. Redakshon di Vigilante ta siguiendo e desaroyonan rònt di Wechi hopi di aserka. Manera ta konosí ta trata akinan di un proyekto ku tin un invershon di 500 mion florin pa konstrukshon di 4000 kas. Di parti di FKP nan a kuminsá ku e promé konstrukshonnan, pero mester a wanta dado momentu pa atendé entre otro e kaso kontra Amigu di Tera. Tur ku pasa den e área por tuma nota di 9 modelwoning.   Ta asina ku den seno di FKP nan ta di opinion ku Amigu di Tera kier stroba e desaroyo nan na Wechi saliendo na fabor di poko habitante na Julianadorp. Segun Arthur Con e no por kaba di komprondé kiko ta e punto di lansa di Amigunan di Tera, paso poko meter mas abou tabatin rosamentu di un área konserva, pero e no a tuma nota ku nan a hasi nada. E problema di mas grandi pa lokual tabata trata konstrukshonnan dje kasnan no tabata  Amigu di Tera, sino e echo ku nan no tabata risibí koperashon di Aqualectra, pero esei a keda atendé te ku a traha riba e promé kasnan, segun deklarashonnan di Arthur Con.   Ta asina ku nos a keda informá dje echo ku di parti FKP nan ta kla pa sigui ku konstrukshon dje kasnan, pero no por hasi esaki sin mas debí ku e invershonistanan tambe ta pendiente pa e kaso den apelashon segun Arthur Con. Niun invershonista no ta kla pa invertí, miéntras ku tin disputa den korte, tabata e palabranan di Arthur Con. Nos ta kla pa sigui. Nos kier kaba ku e proyekto di konstrukshon di 4 mil kas aki. Hasiendo esaki e proyekto lo hasta yuda ekonomia. Hopi hende lo haña trabou, pero nos no por hasi nada, el a sigui mustra nos mas aleu. Di nos parti nos ta kla. Nos a gana e promé kaso, pero Amigu di Tera a apelá. Esaki ta loke ku tin nos wanta, el a sigui añadí. Nan komo FKP ta sinti ku e problema di Amigu di Tera ta e echo ku lo bin kasnan sosial pega ku Juliana Dorp. Nan no kier e tipo di bisiñanan ei, pero Arthur Con ta konvensí ku e proyekto aki lo tuma lugá, paso no tin niun motibu válido pa evitá e kasnan sosial keda konstruí na Wechi.