Coca-Cola a sorpresá Adrinuelly Isenia ku un beka di estudio di 3 aña na balor di Ang. 7.500,-

106

Willemstad——–Resientemente Adrinuelly ’Nuelly’ Isenia pa su gran sorpresa a tende ku Coca-Cola lo bai sostené finansieramente ku su estudio pa un periodo di 3 aña. Aktualmente Adrinuelly ta den e di dos aña di su estudio di “Bachelor Social Work”  na e fakultat di ‘Maatschappij en Gedragswetenschappen’ na Universidat di Kòrsou Dr. Moises da Costa Gomez (UoC).

Despues di un selekshon amplio entre UoC i den konsulta ku Curaçao Beverage Bottling Company B.V. ela ser skohí entre tur studiante di prome aña konosí na UoC, komo ku e tabata kumpli mihó ku e kriterianan di selekshon fihá.

Kolaboradornan di UoC a invité pa un entrevista i sin  sospecha nada, papiando, un representante di CBBC a sorpresé ku e grato notisia di tal donashon. Diferente kolaboradó i tambe e rèktor di e universidat a dirigí nan mes ku palabranan di sosten na Adrinuelly ku tabata basta emoshoná ora ela dirigí su mes korto na esnan presente pa gradisi tur ku tabatin parti den selekshon di e sosten finansiero aki.

CBBC ta desea tur studiante un aña eskolar eksitoso i ademas ta ekspresá su atmirashon pa perseveransia di e hopi studiantenan ku den sirkunstansianan variá ta hasi tur loke ta den nan alkanse pa logra eksito den nan estudio.