Dama 56 aña a bisa wes ku lo el a haña 10 mil euro pa transportá kasi 3 kilo droga

2137
WILLEMSTAD,—- E dama L.K. di 56 aña tabata dilanti wes ayera pa di tantísimo biaha unda el a bolbe keda detené pa motibu ku e tabatin droga den su poseshon, na momentu ku e kier a subi buelo pa Hulanda.

Tabata 26 di yüli último ku el a keda detené ku 2.848 gram di kokaina den su poder. E dama kende tabata den poseshon droga a bisa wes ku e no tabata kier a transportá e droga mas, pero  esun ku ta doño di e droga a oblig’é hasi esaki. El a bisa ku e no kier benta nòmber di e persona aki mirando ku e por hasi su famia nan aki na Kòrsou i tambe na Hulanda daño.

Ya den pasado e dama a kai un total di 3 biaha pa motibu di poseshon di droga. El a bisa ku e ta kier a bai pasa droga, pero e no tabata kier a plak esakinan na su kurpa. Segun su deklarashon ku ta ora el a bin sa ku esaki no ta bai den maleta pero na su kurpa ku el a bisa ku e no kier a bai ku e droga mas, pero ya tabata lat i a but’é bou di preshon.

Tambe e la trese dilanti ku e tabatin basta debe i ku ta pa e motibu aki el a disidí pa bai purba su suerte. El a bisa ku lo e la haña 10 mil euro pa e transporte. El a bisa ku ora a bisé ku e mester bai ku e droga di plak na su kurpa el a pensa mesora riba su nietunan i no kier a hasi esaki mas. Wes a bisa ku e ta haña e dama hopi sin kunes, pa na e edat aki ainda e no ta tuma e echo nan aki na serio.

Fiskal den su rekisitorio a añadí ku e dama por a aserká miembronan di kuerpo duana promé e pasa e parti di kontrol, pa avisá nan ku e ta bou di menasa. El a bisa ku e dama a disidí ku tòg e ta bai tuma e rísiko di pasa e droga. El a pidi un kastigu di 24 luna di prizòn pa e dama, unda wes mr. Edelenbos a bisa ku e no ta mira niun motibu pa desviá for di esaki.