Dos hòmber buská pa atrako detené

164
Willemstad—– Kontinuando ku un investigashon relashoná ku un kaso di atrako ku a tuma lugá 14 di yüni 2019 na un establesimentu na Sta Rosa, polis a detené un hòmber.

 

Djaluna 19 di ougùstùs 2019, alrededor di 15.00’or, Tim di Mantenshon di Órden Públiko, den Kaya Choromi, a detené e hòmber H.S.H., nasé na Kòrsou di 43 aña di edat, komo sospechoso den e kaso di atrako ariba menshoná.

En konekshon ku e detenshon personal di Tim di Atrako a tene entrada hudisial na kas di sospechoso den Montagne Abou, kaminda a konfiská artíkulonan ku ta importansia pe investigashon. Seguidamente personal di Tim di Atrako konhuntamentu ku Tim di Mantenshon di Órden Públiko a bai na un otro kas na Montagne Abou relashoná ku e kaso di atrako. Na e kas polis a haña i konfiská un kantidat di droga.

Kontinuando ku e investigashon djamars 20 di ougústús 2019, alrededor di 11.10’or e hòmber S.N.P., nasé na Kòrsou di 23 aña di edat, a presentá na warda di polis i e tambe a keda detené komo sospechoso den e kaso di atrako ariba menshoná.

Ámbos sospechoso a keda presentá dilanti un Fiskal Ouksiliar ku a ordená nan enkarselamentu pendiente di mas investigashon.