E atleta di Bèlgika lo kompetí den kampionato mundial i weganan olímpiko…. Nafissatou Thiam ta klasifiká den bulamentu leu tambe

78
Nafissatou Thiam ta klasifiká pa mundial i olimpiada den bulamentu leu tambe.
BELGIKA – E atleta di Bèlgika, Nafissatou Thiam, durante e kompetensia di atletismo na Birmingham, a logra klasifiká pa e kampionato mundial di Doha i pa e weganan olímpiko Tokyo 2020 den e disiplina di bulamentu leu.

Ayera djadumingu, nèt un dia promé ku e kumpli 25 aña di edat, Thiam  a logra bula e distansia di 6,86 meter durante di e kompetensia di Diamond League ku a tuma lugá na Birmingham, i di e forma aki ta mehorá su propio rèkòrt (rèkòrt di Bèlgika) ku un distansia di no ménos ku 19 sèntimeter.

Thiam di e forma aki ta hasi su regreso di forma triunfal, despues ku e tabata for di akshon pa dos luna debí na un leshon ku e la sufri na su brasa durante e kompetensia multi disiplina na Talence. Durante di e weganan olímpiko 2016 na Rio de Janeiro Thiam a konkista e medaya di oro den ‘heptathlon’.

Durante e añanan siguiente e atleta di Bèlgika a sa di konkista tambe e titulo mundial i tambe e titulo oropeo den e kombinashon di shete disiplina diferente di atletismo(heptathlon). Thiam no ta sobresalí den solamente e kompetensianan multi disiplina, pero riba algun disiplina individual tambe e ta kompetí kontra speshalistanan di esakinan.

Den e kategoria di bula haltu ya anteriormente e la klasifiká pa e kampionato mundial i ayera na Birmingham e la sa di hasi esaki tambe den bulamentu leu. Thiam ayera a laga e atleta di Servia Ivana Spanovic(number 3 den bulamentu leu na Rio), i e Britániko Katarina Johnson-Thompson presis 1 sèntimeter su tras.