Helikòpter di Wardakosta ta reskatá kuater persona

204
Último parti di e boto bayendo bou di awa.
Willemstad—- Djaluna den oranan di atardi e Sentro di Reskate i Kordinashon di Wardakosta a risibí un ‘mayday call’ riba e kanal VHF 16. E kapitan di e boto di piskadó father gomez a indiká ku nan boto tabata senk.
Warda kosta a hasi un bon trabou dor di reskatá e tripulantenan di e boto ku a senk.

Mesora Sentro di Reskate a lansa e helikòpter di Wardakosta pa lokalisá e boto. E tripulashon, konsistiendo di 4 hende hòmber lokal, tabata rumbo pa Aves na momentu ku nan boto a kuminsa senk bai bou di awa. Na e momento ei nan tabata na parti nort di Klein Curaçao. Na momento ku e helikòpter a yega na e lokalidat indiká, e tripulantenan a mira solamente e kabes di e boto den awa. Nan a bin haña e 4 personanan despues di un ratu na un distansha di mas o menos 1 kilometer for di e boto.

Tur e personan, ku nan chaleko di salbabida bisti, a ser di ‘hoist’ for di awa dor di e helikòpter. Nan tur tabata sano i salvo i por a regresá nan kas.