Mama i yu sospechá di kier a transportá kasi 7 kilo kokaina

1388
WILLEMSTAD,—- Korte mester a trata un kaso ayera unda e dama A.G. i su yu hòmber J.G. lo mester tabata den poseshon di un kantidat di 6.700 gram di kokaina, rumbo eksterior.

Esaki despues ku 30 mei último miembronan di kuerpo duana a realisá un kontrol, unda a bin haña un total di 5  bòter den maleta di e yu hòmber, miéntras den maleta di e mama tambe a bin haña algun  bòter konteniendo droga. Mesora a realisá detenshon di nan 2 unda despues di algun  dia a laga a hóben J.G. bai kas debí na estudio ku lo e mester ta siguiendo na Hulanda.

Ayera durante e tratamentu e dama A.G. a bisa wes ku el a haña aki serka un tal J. i ku el a kumpra e bòternan riba petishon di un amiga ku ta biba na Hulanda. Loke sigur a hala atenshon ta e echo ku Ministerio Públiko kende no tabata sa nòmber ofisial di e tal J. a bai hasi un investigashon pa wak ku nan lo haña e persona aki.

Ministerio Públiko a presentá ku foto di 10 persona ku ta karga e nòmber ku e dama a menta, pero e no a rekonosé niun. Loke tambe a hala atenshon ta e echo ku e no tabatin niun dato di e amiga ku lo a pidié pa trese e bòternan pe na Hulanda. E dama lo a benta nòmber di e amiga ku ta inisiá ku J. unda el a bisa ku e amiga aki lo a pidié un fabor i pone ku e ta será awor. El a bisa ku e ta bon ku e amiga aki i ku e dama ta peña su kabei i hasi masashi pe.

Ministerio Públiko a trese dilanti ku nan no sa sufisiente di e hóben J.G. unda a bisa ku nan lo kier a un rapòrt di reclassering di e sospechoso. Tambe lo bai hasi un intento pa buska e amiga. Wes mr. Edelenbos a bisa ku mirando ku e dama tin yu menor di edat ku mester di dje, lo lag’é rekobrá su libertat awe mèrdia 2or pendiente pa tratamentu di e kaso.

E kaso lo sigui 30 di òktober próksimo den su kontenido.