Nicolas Maduro ta denunsiá ku e presidente Alvaro Uribe ta plania su asesinato

324
Maduro a indiká ku un biaha mas tin plannan maligno den su kontra.

CARACAS – E gobernante venezolano, Nicolas Maduro, a afirmá ku e eks presidente di Colombia Alvaro Uribe Velez, ta kabesá un supuesto plan ku ta kontemplá ingreso na Venezuela di 32 persona, kende nan lo atentá kontra otro dirigentenan di ofisialismo.
Esaki a indiká ku a yega na konosementu, tokante un plan dirigí pa Alvaro Uribe, ku partisipashon di e embahador di Colombia na Estádos Unídos, Francisco Santos, pa manda 32 persona pa intentá asesiná e i otro dirigentenan di revolushon.
Segun Maduro su konosementu, na Colombia nan tin teror di revolushon chavista bolivariano i el a sigurá ku pa e motibu aki nan ta planifiká pa asesin’é.
El a sigui indiká ku tantu e Uribe, Santos i tambe Léster Toledo, a diskutí den e bibienda unda Uribe ta biba.
Mas aleu el a indiká ku na Colombia no solamente tin un kompaña kontra Venezuela i kontra su persona, si no ku ademas, for di Colombia ta prepará aktonan violento. Aunke e mes a indiká ku nada lo sosodé paso nan ta un pueblo protehá pa Dios.
Toledo ta un dirigente polítiko venezolano di e Partido Voluntad Popular, kende ta den eksilio for di aña 2016, despues ku a inisiá ku un investigashon relashoná kuné pa supuesto terorismo i otro delitunan.
Dia 4 di ougùstùs último, na momentu ku a kumpli un aña di e frakaso magnisidio den su kontra, Maduro a bolbe papia di su akusashonnan kontra Colombia pa nan responsabilidat den e supuesto konspirashonnan.
Maduro a denunsiá ku serka di 30 plan den su kontra a keda kibrá desde e momentu ku el a asumí mandato na aña 2013.
Venezuela ta pasando den un pik di tenshon polítiko for di luna di yanüari último, na momentu ku Maduro a hura un mandato nobo di seis aña ku no a keda rekonosé pa e oposishon i parti di e komunidat internashonal. Esaki debí ku e gobernante a optené reelekshon den kua a prohibí partisipashon di lidernan opositor.