‘OM ta separá esnan ku a drenta dil i esnan ku no a drenta dil’

201
WILLEMSTAD,—Abogado mr. Martina a pleita ayera pa su kliente den e kaso Troya, unda el a bisa ku Ministerio Públiko ta presentá pa drenta dil ku e sospechosonan i si bo no drenta dil, bo ta esun ku ta bai wòrdu kastigá mas fuerte.

Segun e abogado ku Ministerio Públiko separá e grupito di esnan ku a drenta dil i esnan ku no a drenta dil. Mr. Martina a trese dilanti ku OM ta yama e gruponan, ‘Deal’ of ‘No Deal’. El a bisa ku ta dependé den kua grupo bo ta kai, ta sa kon bo ta wòrdu tratá. E defensa a bisa ku no ta lógiko kon e mesun Ministerio Públiko ku a pidi kastigu di prizòn pa su kliente, ta protehá Itzhak Grynsztein ku si a bai di akuerdo pa drenta dil ku nan.

Tur esaki despues ku ayera Ministerio Públiko a bisa di lo kier subi e demanda di kastigu, unda a hasi esaki 36 luna di prizòn. Tambe Ministerio Públiko a pidi pa konfiská un montante di 7.3 mion dòler for di Andrade. Abogado mr. Martina a trese dilanti ku e echo ku su kliente ta kai den e grupo di ‘No Deal’ ta pone ku ta pidi pa ekspropiá hopi mas tantu plaka di loke en bèrdat ta probá ku e tabatin, miéntras tambe ta pidi pa e bai prizòn pa 3 aña.

E defensa a bisa ku e sistema ku Ministerio Públiko ta tratando su kliente no hustu i kier konfiská un kantidat di sèn ku e no ta disponé di dje. El a trese dilanti mas aleu ku ta remarkabel ku su kliente tabata gana 4 porshento for di kada transakshon, miéntras e mester a parti esaki ku su supagente nan.

Segun e defensa ku Itzhak Grynsztein ku e kompania Monterrey tabata gana 14 porshento riba kada transakshon ku nan hasi. E defensa a trese dilanti ku den kaso di su kliente, e tabatin un ganashi di 2 porshento riba kada transakshon despues ku e kaba di paga e supagente nan. Loke tambe a defensa a trese dilanti, ta e echo ku no a ni tene kuenta ku su kliente, esta ku no a pidi niun parti di e kastigu kondishonal.

Fiskal mr. Mul kende a bin for di Hulanda pa trata e kaso, a trese dilanti ku ya nan a tene kuenta ku de Adrade, esta kliente di mr. Martina den e demanda. E fiskal a bisa ku nan tabata bai pidi 60 luna di prizòn pa e sospechoso, esta 5 aña inkondishonal. Segun Ministerio Públiko ta dor ku a tene kuenta ku e sospechoso a baha su kastigu na 30 luna di prizòn inkondishonal.

Loke sigur a hala atenshon di e defensa di mr. Martina, ta e echo ku el a bisa ku ya a pidi kastigu di prizòn pa su kliente i si e no por paga e montante ku a ekspropiá lo e  bolbe bai sinta kastigu di prizòn pa esaki, miéntras e sospechoso prinsipal ta li ber i ta bibando trankil di dje na Merka.