‘Riky’ de Leca lo dirigí Vesta vs Vespo

105
Refri Ricangel 'Ricky' de Leca.
WILLEMSTAD—Manera ya ta konosí, djasabra benidero, dia 17 ougùstùs 2019, ta fecha pa inisio di e torneo di futbòl, Kopa ABC 2019. Ta trata aki di e segundo edishon di e kompetensia aki, ku lo konta ku partisipashon di ekiponan kampion i supkampion di e islanan ABC.

Lo bira torneo ku lo hunga riba 3 djasabra siguí pa finalisá djasabra dia 31 ougùstùs benidero, ku lo konta ku e ekiponan di Aruba, ku ta RCA i Nacional, di Boneiru lo tin Real Rincon i Vespo, miéntras ku Vesta i Scherpenheuvel, lo ta e ekiponan ku ta representá Kòrsou.

Riba e promé fecha, djasabra benidero tur ekipo kampion lo ta den akshon na kas, dilanti di nan mes públiko. Esaki ora ku e ekipo kampion di Korsou, Vesta, hunga den Stadion Ergilio Hato na Brievengat, kontra di supkampion di Boneiru ku ta Vespo. Lo bira partido ku rèfri Ricangel ‘Riky’ de Leca for di Aruba lo dirigí.

Na Boneiru e kampionnan, ku ta Real Rincon, lo risibí bishita di e supkampionnan di Aruba, ku ta Nacional. E wega aki lo hunga den Stadion Antonio Trinidad na Rincon, unda rèfri Juniel ‘Araña’ Adelina, for di Kòrsou, lo dirigí.

Miéntras ku na Aruba, Scherpenheuvel, komo supkampion di Kòrsou, lo ta di bishita pa asina enfrentá R.C.A., den Kompleho Deportivo Guillermo Trinidad na Dakota. Lo bira partido ku rèfri Cassius Coffi, for di Boneiru, ta programá pa dirigí.

Ta trata aki di un trio, konosí den arbitrahe na e islanan, kende inkluso ya a dirigí den e promé edishon di Kopa ABC, aña pasá.