Testigu anónimo B5 tabata kardinal pa sentensia di eks Minister

237
Abogado mr. Peppie a defendé Jorge.
WILLEMSTAD,—-Ayera wes mr. van Lieshout a kondená Jorge Jamaloodin na 28 aña di prizòn, despues ku Ministerio Públiko a pidi 30 pe, pero wes a deklar’é liber di un di e akusashonnan.

Wes a lesa e sentensia pa un ora ayera den korte, unda el a bisa ku tin algun deklarashon basta inkriminante den direkshon di Jorge. El a bisa ku e deklarashon di B5, esta ku Jorge tabata tras di e asesinato, por wòrdu probá mirando e detayenan ku e tabatin di hinter e suseso.

Testigu a deklará ku Pretu Florentina tabata tras di e atrako di e barku Summer Bliss, unda a bai ku 11 mion dòler na oro for di e barku. E testigu aki lo a deklará ku ta Jorge Jamaloodin lo mester a paga pa e asesinato. Tambe el a bisa ku Nini Fonseca lo tabata e intermediario entre Pretu Florentina ku Jorge mirando ku nan mes no tabata papia ku otro.

Tambe e testigu aki lo a deklará ku Bolle lo tabata e shofùr miéntras Monster a baha tira Helmin Wiels. El a bisa ku promé ku e asesinato tabatin un reunion den garashi di Pretu. Tabata 5 di mei 2013 ku lo mester a kambia e tarea segun e testigu. El a deklará ku tabata aki ku lo a bin ku e idea pa kita bida di Wiels, mirando ku primeramente lo kier a trak’é.

Segun e testigu ku kada bes e tabata tende nan papia di  ‘e hòmber’ pero e no tabata sa ta ken primeramente. El a splika mas aleu ku nunka no a benta nòmber di Robbie Dos Santos, pero nòmber di Jorge si el a tende. Tambe el a bisa ku Pretu lo tabata debe Jorge 100 mil florin, mirando ku e no tabatin plaka pa paga esnan ku a tira e atrako riba e barku.

Loke sigur a hala atenshon ayera den e kaso ta e echo ku wes a uza e deklarashon di e testigu aki pa kondená Jorge. Esaki tabata sosten pa wes kondená Jorge na 28 aña di prizòn.