Venezolano na rudia den korte bogando wes pa e bai kas

387
WILLEMSTAD,— Korte mester a trata kaso di e sospechoso Raul Flores, ayera despues ku segun Ministerio Públiko lo e mester a tira atrako riba un víktima i ranka su telefòn.

Tabata 19 di aprel tras di lomba ku polisnan lo mester a bai duna asistensia pa un kaso di atrako ku a tuma lugá. Na yegada di e miembronan di kuerpo polisial a bin haña un dama, ku lo mester a keda atraká unda a kita su telefòn for di dje.

En konekshon ku e kaso di atrako a detené e hòmber di nashonalidat venezolano di fam Flores, unda ayera e tabata dilanti wes. Mester a trata su kaso den kontenido, unda el a bisa ku e ta atmití ku el a kometé e echo aki. Segun e sospechoso Flores ku el a kometé e echo aki i ku e tabatin mester di plaka pa kuida su yu.

Mas aleu el a bisa ku e ta lamentá di a kometé esaki, mirando ku awor e ta será i no por kuida su yu. El a pidi wes pa e haña su libertat pa asina e por bai kuida su famia nan. Fiskal mr. Koert kende ta esun ku ta na enkargo di e kaso, a pidi wes pa posponé e kaso mirando ku awor a habri un kaso mas kontra di e sospechoso.

Segun Ministerio Públiko ku tin un kaso mas di ladronisia ku violensia kontra di e sospechoso i lo kier pa trata nan tur huntu. Tabata na e momentu aki ku e sospechoso a kuminsá papia na momentu ku su abogado i tambe fiskal, ku asta polis lo mester a aserk’é pa bisé keda ketu. Flores  a bisa ku e no ta esun ku  a kometé e di 2 echo ku tin kontra di dje. El a asta hinka rudia durante a tratamentu, unda el a pidi wes pa lag’é bai kas.

Mas aleu el a indiká ku e ta repentí di e kaso di 19 aprel, pero ku e no sa nada di e otro kaso. Su abogado a pidi pa trata e kaso mesora, esta pa trata  pa trata esun di 19 aprel último. Wes a bisa ku e no por bai di akuerdo ku esaki, mirando ku mester kaba ku e investigashon ku tin kontra di e sospechoso i ku no por lag’é bai kas.

A posponé e kaso pa 13 di sèptèmber próksimo.