Welek ta mata sinku persona na Cuba

126
Welek aparentemente ta e kousa number 1 di mortonan relashoná ku asuntunan meteorológiko na e pais.

LA HABANA – Sinku persona a pèrdè nan bida, entre nan tres menor di edat, despues di a keda impaktá pa un welek durante un tormenta na e provinsia kubano di Mayabeque.
E aksidente, ku tambe a laga otro menor di edat heridá, a keda produsí riba e atardi di djaweps último na e playa La Puntilla di e lokalidat di Santa Cruz del Norte.
Te ainda no a identifiká e víktimanan mortal públikamente, miéntras ku e menor heridá, ta interná den un sentro médiko di Juan Manuel Marquez di La Habana. Aki ta unda e ta risibiendo atenshon médiko spesialisá.
Segun medionan di komunikashon kubano, e isla ta un di e teritorionan mas afektá pa welek rònt mundu, esaki debí na e gran aktividat eléktriko ku ta karakterisá tormentanan di e pais.
Segun datonan di e Instituto kubano di Geofisika i Astronomia, publiká na 2018, al ménos 65 persona a pèrdè nan bida na Cuba kada aña pa impakto di welek. Esaki inkluso ta e promé kousa di morto pa ku fenómenonan meteorológiko na e pais, ku un total di 1.682 fayesementu registrá entre aña 1979 i 2013.
E fenómeno aki ta mas frekuentá den lunanan di fakansi, debí na e kalentamentu serio di airu i kontakto ku superfisie terestre.