Wes a laga atrakadó bai kas despues ku e la atmití

240
WILLEMSTAD,—- E hòmber A. F. a presentá dilanti wes ayera pa un kaso unda e mester a kometé un ladronisia ku violensia, lagando e víktima nan ku basta trouma.

Tabata 11 di yüli último ku e sospechoso lo mester a baha 2 víktima for di un skuter, pa e por bai ku esaki. Riba e dia en kuestion e sospechoso lo mester a yega ku un pipa segun su deklarashon, unda el a bisa ku e la bisa e víktima nan pa baha i nan a baha.

Segun F. ku e no a hasi uzo di violensia pa logra su meta riba e dia en kuestion. Ministerio Públiko tabatin e akusashon di poseshon arma kandela tambe kontra di e sospechoso,  mirando ku e víktima lo a deklará ku e sospechoso tabata disponé di un arma i ku ta esaki el a menas’é.

E sospechoso mes a splika ku ta un pipa koló skur e tabatin i no tabatin arma kandela. El a añadí ku e no ta gai ku ta uza arma kandela. Mas aleu el a trese dilanti ku e ta un gai ku ta lanta bai traha tur dia i ku ta nesesidat i mal amigu ta e motibu dikon e ta será. Segun F., ku e tabata traha riba un trùk i ku esaki a daña, pues e no tabatin trabou mas.

Tambe el a bisa ku el a bai buska trabou na supermerkadonan, pero e no a haña. Segun su deklarashon ku e ta e úniko ku ta kuida su famia, miéntras su señora ta keda kas i wak e yu nan. Fiskal a bisa ku mirando ku e sospechoso a koperá i tambe su situashon personal lo e no pidi kastigu haltu pe.

El a bisa ku normalmente ta pidi 3 aña di prizòn pa tipo di atrakonan manera esaki. Mr. Koert a pidi 360 dia di kual 325 ta kondishonal ku 3 aña di prueba i tambe guia di Reclassering pa e sospechoso. Wes mr. Gruijters a bai di akuerdo ku e demanda, unda el a honra esaki pa e sospechoso rekobrá su libertat mesora ayera.