A reanudá búskeda di kurpanan sin bida despues di erupshon di volkan de Fuego

317
Den oranan di ayera a reanudá búskeda di esnan reportá komo pèrdí mas di un aña pasá.

GUATEMALA – Mas di un aña despues di e erupshon violento di volkan de Fuego di Guatemala, kua a laga saldo di mas ku 200 víktima mortal, a reanudá den oranan di ayera e búskeda di mas víktimanan di e tragedia aki.

E grupo di boluntarionan Antigua Al Rescate, formá na rais di e erupshon, a anunsiá e reinisio di e rekuperashon di kurpanan na San Miguel Los Lotes, aldea ku e volkan a kaba kuné dia 3 di yüni di aña pasá.

Den komunikado sumamente breve, publiká riba retnan sosial, Antigua Al Rescate a selebrá ku e estado, pa promé biaha den historia, a destiná rekursonan pa un proseso di e naturalesa aki, indispensabel pa sera e siklo ku esnan afektá ta biba.

Dia 3 di yüni di aña 2018, e volkan de Fuego tabatin e erupshon di mas grandi di historia ku a laga saldo di 201 persona morto, miéntras ku otro 229 ta ainda reportá komo pèrdí entre vários tòn di baranka, sas, restunan i lodo.