Curcon ta bati bankarota laga Marie Pampoen na mitar

Curcon a pidi bankarota

1333
Te akinan e kompania Curcon a logra pone e konstrukshon ku ta tumando lugá na Maripampoen promé ku nan a pidi bankarota.
Willemstad,–  Vigilante tabata presente ayera na e proyekto di Mari Pampoen ku tin basta tempu andando i ku ta di hopi importansia pa e bario di Mari Pampoen, ta trata aki di e remodelashon di e tereno di futbòl.

E kompania konstruktor di mas grandi ku ta trahando riba e proyekto i ku ta Curcon a apliká pa bankarota i kual ta nifiká ku hinter e proyekto ku gobièrnu a hinka miónes aden por keda stagna.  Vigilante a papia ku representantenan di Curcon, kendenan a splika nos ku nan ta bai trata di papia ku e curator pa trata di skapa e proyekto aki.

Ta un proyekto ku mundu di futbòl a bin ta warda su yegada. E kompania prinsipal ku ta hasiendo e trabounan di konstrukshon pues a pidi bankarota djarason último despues ku gobièrnu a inbertí miónes den e proyekto.

Por tuma nota ku ya e vèlt di futbòl si ta kla i kubri ku yerba artifisial kaminda otro kompanianan mas chikí ta hasiendo e tokenan final.

Ta trata di e tereno konosí komo tereno di defuntu Ain van Aahholt. E proyekto ta kore peliger serio di keda stagna.

Ta un proyekto masha bunita mes ku mundu di futbòl a bin ta warda riba dje pa finalisá  i ku gobièrnu tin 5 aña planeando i ehekutando pa awor bin tende ku Curcon a apliká pa bankarota.

Ayera a keda pa sa ken lo ta e curator den e proseso di bankatora di manera ku Curcon por supliká e curator pa tòg finalisá e proyekto aki ku Kòrsou i bario di Mari Pampoen tin años ta wardando i kual ta un soño di defuntu Aim van Aanholt kende a laga hinter e maneho aki den un fundashon atras pa entre otro e inkansabel Andy Janga di bario di Mari Pampoen, kende lástimamente  mester mira un peliger ku e proyekto aki por para i stagna debí ku e kompania konstruktor a bai bankarota.

Pues un proyekto hopi bunita i ku Kòrsou tabata kla pe, awor ta kore rísiko di keda stagna pa e echo ku e kompania Curcon a bai bankarota.

Un súplika na gobernantenan i minister di VVRP i di turismo pa trata di salba e proyekto aki, mirando ku e kompania konstruktor a súplika bankarota. Ta un proyekto sumamente bunita di defuntu Aim van Aanholt i ku pueblo di Mari Pampoen i di Kòrsou en general tin masha hopi aña ta wardando riba dje. Hopi ta futbolista nan di entre Kintjan, Maripampoen i besindario ku a hunga bala riba e tereno aki i tabata en espera pa e proyekto aki finalisá.