Damita di 17 aña por poko a keda sekuestrá

358
Savonet- Ayera den oranan di mainta trempan un damita mester a sali pa bai su skol i mester a pasa sustu di su bida. E damita aki mester a sali kas normal manera tur dia pa bai skol i tabata para na altura di un parada di bus na Savonet pa warda bus pa bai skol.

Tabata mas o ménos mitar di 6 ku un tipo den un vehíkulo chikí kolo blanku mester a yega i para su vehíkulo einan. E tipo mester a puntra e damita kon yam’é. E damita ku e momentu ei no a kontesta e tipo esaki mester a baha for di su vehíkulo i akinan e tipo mester a bai direkshon di e damita. E momentu ei e hòmber aki mester a trata na sekuestrá e damita i bou di forsa.  E damita a resistí i a kuminsá bringa ku e tipo kaminda e la dal e tipo ku telefon den su kara dos biaha pa e por a logra di hui. Tambe momentu ku e tabata na trata di sali for di garanan di e tipo e mester a leshoná su pia.

Debí na tantu gritu habitantenan a sali i tuma nota di loke a pasa. E hòmber ku mester a hasi e akto aki tin un deskripshon di ta un persona kolo brùin skur i mester tin un tatuahe di lágrima na su kara. Tambe e mester tin un òf mas tatuahe na su kurpa. E damita a keda troumatisá ku e akto aki i mester a bai dòkter pa asina dun’é tratamentu. E situashon ta birando mas i mas ferfelu riba nos isla, mirando ku awor a ni hóbennan no por sali trankil mas pa bai nan skol i nan ta keda ataka pa kriminalnan. E hóben aki a logra di skapa, pero e ta keda ku un trouma pa loke e mester a pasa aden. Ki ta para di e otro hóbennan ku tambe mester ta sali kas mainta trempan pa warda bus of konvoi pa bai skol i nan por haña nan den un situashon asin’aki. Mester tin patruyahe di polisnan riba kaya den oranan di mainta speshalmente na momentu ku siudadanonan ta sali pa bai traha òf bai skol. Situashon riba e isla aki ta birando dia pa dia mas pió, kriminalnan ta pensa tur manera pa kometé nan aktonan.  Un hóben di apénas 17 aña a keda troumatisá pa un tipo sin eskrúpulo.

Foto Kaminda e hóbennan tabata para na Savonet wardando pa e haña bus pa asina e por a bai su skol.