Dos menor di edat ta fayesé den noufragio registrá den Karibe

422
Nicaragua ta pasando den su temporada ku mal tempu ta frekuente na e pais.

MANAGUA – Dos menor di edat a pèrdè nan bida hogá i otro sinku mas a keda reskatá na bida, na momentu ku un embarkashon a noufragá den awanan di Karibe, dilanti kosta di Nicaragua.

E víktimanan, un mucha hòmber di seis aña i un mucha muhé di kuater aña, meskos ku esnan ku a sa di sobrebibí, tabata biaha den e embarkashon ‘III Hermanos L’, kua a bòltu debí na fuerte olanan pa e tempu ku tabatin na e momentunan ei.

E noufragio a tuma lugá poko despues di 10 or na masoménos 27 mia nort di e siudat di Bilwi, di unda el a sali.

E embarkashon tabatin e komunidat na kosta di Sandy Bay koko destino, komo parti di su rekorido diario na momentu ku e ta brinda servisio di transporte kolektivo pa e Region Outónomo Karibe Nort, na parti nortost di Nicaragua.

Na momentu di e noufragio di e embarkashon, tabatin un total di 18 okupante abordo, inkluyendo e kapitan, di kua shete tabata menornan di edat.

Esnan ku a sa di sobrebibí a keda atendé na Bilwi pa funshonarionan di Ministerio di Salú.
E kousanan di e noufragio no a keda determiná i e Forsa Naval a sa di konfirmá ku lo inisiá ku investigashonnan den e kaso aki.

Un dia promé, den e mesun zona, un mal tempu a kousa morto di dos marinero pa un deskarga eléktriko, na momentu ku nan a keda alkansá pa un welek.

Otro noufragio a sosodé den oranan di siman pasá, na un riu di e Region Outónomo Karibe Sùit, na sùitost di Nicaragua, unda dos hòmber i un beibi di tres luna di bida a pèrdè nan bida.

E mal kondishonnan di tempu ta frekuente entre luna di mei i novèmber na Nicaragua, debí na influensia di e époka di áwaseru, kua ta koinsidí ku e temporada di orkan.